علی گڑھ: ذہنی طور سے تندرست رہنے کے لیے جسمانی تندرستی ہونا ضروری ہے اور جسمانی تندرستی کے لیے اچھی اور صحت مند غذا کے ساتھ ساتھ ورزش کرنا بھی ضروری ہوتا ہے لیکن آج کل نوجوان بازاروں میں دستیاب مختلف قسم کے جسمانی سپلیمنٹ کا استعمال کرکے اپنے آپ کو جسمانی طور سے صحت مند دکھانے کی کوشش کرتے ہیں جس کے مستقبل میں فائدے کم نقصانات زیادہ ہوتے ہیں۔ آج کل کی بھاگ دوڑ بھری زندگی میں نوجوان نسل منشیات میں بھی مبتلا نظر آرہی ہے جس سے دور رہنا چاہیے۔ Youth Stay Away From Drugs
ان خیالات کا اظہار مشہور باڈی بلڈر اسلم ملک نے علی گڑھ کے علاقے جنگل گڑھی میں ایک جِم کے افتتاح کے دوران کیا۔ اس دوران اسلم ملک نے نوجوانوں کو جِم کرنے کے فائدے بتائے اور جسم سے متعلق دیگر معلومات بھی دیں۔ پریس کانفرنس میں صحافیوں سے خطاب کرتے ہوئے اسلم ملک نے کہا کہ آج کا نوجوان منشیات کی طرف بڑھ رہا ہے جو اس کی زندگی کے لیے نقصان دہ اور خطرناک ہے۔ نوجوان اچھی غذا اور محنت کے بغیر شارٹ کٹ راستہ اپناتے ہوئے بازاروں میں کم قیمت کے جسمانی سپلیمنٹ اور دیگر غیر ضروری ادویات کا استعمال کر رہے ہیں۔
اسلم ملک نے نوجوانوں کو پیغام دیتے ہوئے کہا کہ نوجوان جتنی زیادہ منشیات کی دنیا سے دور ہوں گے اتنا ہی بہتر ہوگا۔ انہوں نے نوجوانوں سے منشیات سے دور رہنے کی اپیل کی۔ اس کے ساتھ ہی انہوں نے کہا کہ کچھ لوگ اچھی باڈی کے لیے کچھ غلط کیمیکلز کا استعمال کرتے ہیں جو جسم کے لیے بہت خطرناک ہیں۔ نوجوان اپنے جسم پر سخت محنت کریں اور بہتر غذا کے ذریعے باڈی بنائیں۔
