جموں و کشمیر کے ضلع راجوری کے علاقہ کوٹرنکہ سے تعلق رکھنے والے تین نوجوان مزدوری کرنے کی غرض سے کشمیر گئے تھے تاہم 17 جولائی سے ان کا رابطہ اہلخانہ سے نہیں ہو پایا ہے۔
تفصیلات کے مطابق کوٹرنکہ کے رہنے والے ابرار احمد ولد بگا خان عمر 16 برس سکنہ دھار ساکری، امتیاز احمد ولد صابر حسین عمر 20 برس ساکنہ دھار ساکری اور ابرار احمد ولد محمد یوسف ساکنہ ترکسی عمر 25 برس گزشتہ ماہ کی 16 تاریخ کو مزدوری کی خاطر گھر سے شوپیاں گئے تھے۔ وہاں پہنچ کر 17 جولائی کو انہوں نے اہل خانہ سے بات چیت کی تھی۔ لیکن تب سے لیکر آج تک تینوں نوجوانوں سے رابطہ نہیں ہو پا رہا ہے۔
اہلخانہ کے مطابق تینوں کے فون بند ہیں جس کی وجہ سے کنبہ کے افراد میں تشویش پھیل گئی ہے۔
اس ضمن میں اہل خانہ نے پولیس چوکی پیڑی میں ایک گمشدگی کی رپورٹ درج کرائی ہے۔ تاہم انہوں نے عوام الناس سے اور انتظامیہ سے بھی اپیل کی ہے کہ ان تینوں نوجوانوں کا پتا دریافت کرنے میں ان کی مدد کی جائیں۔
