بانڈی پورہ: کرنٹ لگنے سے ایک نوجوان ہلاک

پولیس افسر نے بتایا کہ عرفان احمد کو بے ہوشی کی حالت میں ضلع ہسپتال بانڈی پورہ منتقل کیا گیا تھا لیکن وہاں ڈاکٹروں نے اس کو مردہ قرار دیا۔

شمالی کشمیر کے ضلع بانڈی پورہ کے کلوسہ علاقے میں منگل کی صبح ایک 22 سالہ نوجوان بجلی کا کرنٹ لگنے سے لقمہ اجل بن گیا جبکہ اس کا دوسرا ساتھی زخمی ہوگیا۔

ایک پولیس افسر نے بتایا کہ بانڈی پورہ کے کلوسہ میں منگل کی صبح کام کے دوران ایک نوجوان بجلی کا کرنٹ لگنے سے ہلاک جبکہ دوسرا زخمی ہوگیا۔

انہوں نے مہلوک مزدور کی شناخت عرفان احمد حجام ولد غلام رسول حجام ساکن کلوسہ اور زخمی مزدور کی شناخت عاقب آہنگر ولد غلام احمد آہنگر ساکن کلوسہ کے بطور کی ہے۔

موصوف پولیس افسر نے بتایا کہ عرفان احمد کو بے ہوشی کے عالم میں ضلع ہسپتال بانڈی پورہ منتقل کیا گیا تھا لیکن وہاں ڈاکٹروں نے اس کو مردہ قرار دیا۔

انہوں نے کہا کہ طبی و قانونی لوازمات کی ادائیگی کے بعد لاش کو آخری رسومات کی انجام دہی کے لئے لواحقین کے حوالے کردیا گیا ہے۔ دریں اثناء پولیس نے اس ضمن میں ایک کیس درج کر کے تحقیقات شروع کی ہیں۔