دفعہ 370 کی منسوخی کے بعد صورتحال ابتر: گپکار الائنس

دفعہ 370کی منسوخی کو دو سال مکمل ہو چکے ہیں، جہاں ایک جانب بی جے پی لیڈران و کارکنان جشن منا رہے ہیں وہیں اکثر مقامی سیاسی جماعتیں دو سال قبل بی جے پی کی جانب سے لیے گئے فیصلوں کی مذمت کر رہی ہیں۔

جموں کشمیر کی خصوصی آئینی حیثیت کی منسوخی کی دوسری برسی کے موقع پر پیپلز الائس فار گپکار ڈکلریشن (پی اے جی ڈی) سے وابستہ سیاسی رہنمائوں نے نیشنل کانفرنس کے صدر ڈاکٹر فاروق عبداللہ کی رہائش گاہ پر ہنگامی اجلاس منعقد کیا۔

اس میٹنگ میں پی ڈی پی صدر و سابق وزیر اعلیٰ محبوبہ مفتی، الائنس کے ترجمان محمد یوسف تاریگامی اور مظفر شاہ نے شرکت کی۔

میٹنگ کے اختتام پر پی اے جی ڈی کے ترجمان یوسف تاریگامی نے میڈیا کو بتایا کہ بی جے پی نے دفعہ 370کو منسوخ کرنے کے وقت کہا تھا کہ یہاں تعمیر و ترقی ہوگی لیکن جموں وکشمیر کی صورتحال ابتر ہوگئی ہے۔

یاد رہے کہ پانچ اگست 2019کو بی جے پی حکومت نے پارلیمنٹ میں جموں و کشمیر تنظیم نو ایکٹ 2019کو منظوری دیکر دفعہ 370کو منسوخ کرنے کے علاوہ سابق ریاست کو دو یونین ٹریٹریز - جموں و کشمیر اور لداخ - میں تقسیم کیا تھا۔

پی اے جی ڈی کا وجود دفعہ 370کہ منسوخی کے چند روز قبل ہوا تھا اور گزشتہ ایک برس سے الائنس دفعہ 370 کی بحالی کے متعلق سرگرم ہے۔