پی ڈی پی کی سربراہ محبوبہ مفتی اپنی پارٹی کے سینئر رہنماؤں اور ساتھیوں سے ملاقات کے لئے جمعرات کو جموں پہنچیں گی۔ اس دورے سے قبل پارٹی کے دفتر میں سابق وزیر اعلیٰ کے نئے بینرس اور پوسٹرس لگائے گئے ہیں۔ سہ پہر کو پی ڈی پی سربراہ گیسٹ ہاؤس میں پارٹی وفد سے ملاقات کریں گی۔
جمعہ کو محبوبہ مفتی پارٹی آفس جائیں گی جہاں وہ پارٹی کے مختلف وفود سے ملاقات کریں گی۔ پی ڈی پی رہنماؤں کا کہنا ہے کہ سول سوسائٹی کے کچھ ممبران اور کسان قائدین کو بھی بلایا جائے گا۔
سات نومبر کو جموں میں گپکار اعلامیہ میں شامل فریقوں کا اجلاس ہونا ہے۔ یہ اجلاس جموں میں فاروق عبد اللہ کی رہائش گاہ پر ہوگا۔ جمعہ کو فاروق عبداللہ بھی جموں پہنچ رہے ہیں۔ اسی دوران جموں میں بہت سے سیاسی، سماجی اور غیر سماجی تنظیموں نے گپکار اعلامیہ کی مخالفت کی ہے۔
بی جے پی اور اس کی ہم خیال پارٹیوں نے پہلے ہی گپکار اعلامیہ کی مخالفت کی ہے۔ بی جے پی کے ریاستی صدر رویندر رینہ نے حال ہی میں گپکار اعلامیے میں شامل جماعتوں کو ملک دشمن قرار دیا تھا۔
