ان دنوں ہندی سنیما کے کئی فلم ساز وادی میں فلم اور ویب سیریز کی شوٹنگ کے لیے خیمہ زن ہیں۔ کشمیر کی صورتحال پر مبنی ویب سیریز 'کشمیر- انیگما آف پیراڈائز' (Kashmir-Enigma of Paradise) کی شوٹنگ جاری ہے۔
دس قسطوں پر مبنی اس ویب سیریز کے مین اداکار رجنیش دوگل اور اکانکشا پوری ہیں جب کہ دیگر معروف اداکار نصیرالدین شاہ اور پریش راول بھی اس میں اپنا کردار ادا کریں گے۔ اس ویب سیریز کے ڈائریکٹر اتل اگروال ہوں گے۔ ای ٹی وی بھارت سے اتل اگروال نے کہا کہ 'یہ سیریز دس قسطوں پر مبنی ہے اور ہر قسط 45 منٹ کا ہوگا۔
اداکار ابھیجیت جسروتیا نے اس ویب سیریز پر بات کرتے ہوئے کہا کہ پوری دنیا کشمیر کی تاریخ اور یہاں کے حالات کے متعلق جاننا چاہتے ہیں اور انہوں نے امید ظاہر کی کہ اس سیریز کے بعد دنیا کو کشمیر کے حقیقت سامنے آئے گی۔
انہوں نے کہا کہ اس ویب سیریز کی شوٹنگ 120 دنوں میں مکمل ہوجائے گی، اس ویب سیریز کی شوٹنگ کے پیش نظر 200 کریو ممبران وادی میں شوٹنگ کے لئے رہیں گے۔ اداکار رجنیش دگل جو اس ویب سیریز میں اہم کردار ادا کررہے ہیں، اس بابت انہوں نے کہا کہ یہ ویب سیریز ایک لو اسٹوری کے درمیان وادی کے تاریخی پس منظر اور صورتحال پر مبنی ہے۔
اکانکشا پوری نے کہا کہ اس فلم میں اپنا کردار ادا کرکے میں اپنے آپ کو خوش قسمت سمجھ رہی ہوں، اداکارہ نہارکہ رائزادہ جو اس فلم کا ایک اہم کردار ہیں انہوں نے بتایا کہ وہ کشمیر میں اس ویب سیریز کی شوٹنگ کے لئے کافی خوش اور پُرجوش ہیں۔ یاد رہے کہ جموں و کشمیر کے ایل جی منوج سنہا نے متعدد بار کہا ہے کہ ان کی کوشش ہے کہ وادی میں فلم سازی شروع ہو۔
مزید پڑھیں: اننت ناگ: دریائے لدر ڈمپنگ سائٹ میں تبدیل
قابل ذکر ہے کہ انتظامیہ نے فلم پالیسی کے تحت فلم سازوں کو یہاں پر کئی مراعات دینے کے لئے پالیسی نافذ کی ہے تاکہ یہاں پھر سے فلم شوٹنگ شروع ہوسکے۔
