حیدرآباد: دہلی شراب پالیسی معاملہ میں بی آر ایس کی رکن قانون ساز کونسل کے کویتا کی عدالتی تحویل میں اس ماہ کی 23تاریخ تک توسیع کردی گئی۔سی بی آئی کے عہدیداروں نے کویتا کو دہلی کے راس ایونیوکورٹ میں پیش کیا۔ اس موقع پر مرکزی جانچ ایجنسی کے وکیل نے کویتا کو 14دنوں کے لئے تحویل میں دینے کی درخواست کی تاہم عدالت نے23اپریل تک ان کو تحویل میں دینے کا فیصلہ سنایا۔
عدالت سے نکلتے ہوئے کویتا نے وہاں منتظر میڈیا کو بتایا کہ یہ سی بی آئی تحویل نہیں بی جے پی کی تحویل ہے، باہر بی جے پی والے کیا بات کررہے ہیں، اندر سی بی آئی والے پوچھ رہے ہیں۔ دو سال سے ان سے پوچھے گئے سوال دوبارہ پوچھے جارہے ہیں۔ اب جانچ ایجنسی کے پاس پوچھنے کیلئے کوئی نئی بات نہیں ہے۔
دہلی شراب پالیسی گھوٹالہ معاملے میں گرفتار شدہ بی آر ایس پارٹی لیڈر کے کویتا نے ضمانت کے لئے عدالت سے رجوع کیا تھا تاہم انہیں عدالت سے راحت نہیں ملی ہے۔ عدالت نے ان کی عبوری ضمانت کی درخواست مسترد کردی تھی۔ کے کویتا نے اپنے بیٹے کے امتحانات کا حوالہ دیتے ہوئے عدالت سے ضمانت کی مانگ کی تھی۔ کے کویتا بی آر ایس (بھارتیہ راشٹرا سمیتی) کی لیڈر ہیں، اور وہ دہلی ایکسائز پالیسی کیس میں ای ڈی کے ریمانڈ کے بعد عدالتی حراست میں ہیں۔
واضح رہے کہ دہلی شراب پالیسی معاملے میں دہلی کے وزیراعلی اروند کیجروال اور عام آدمی پارٹی کے رہنما منیش سسودیا، ستیندر جین کو بھی گرفتار کیا گیا ہے۔ اور یہ رہنما تہاڑ جیل میں بند ہے۔
