لکھنؤ: یوپی کے لکھنؤ میں سیلیبرٹیز میڈوز کی کثیر المنزلہ عمارت کی نویں منزل سے گر کر ایک لڑکی کی موت کے معاملے میں نیا موڑ سامنے آیا ہے۔ پولیس نے اس معاملے میں ایک نوجوان کو گرفتار کیا ہے۔ تحقیقات سے پتہ چلا ہے کہ لڑکی خود نویں منزل سے نہیں گری۔ دراصل پارٹی کے دوران لڑکی کے دو شرابی دوست اس کے ساتھ بدتمیزی کر رہے تھے۔ عصمت دری میں ناکامی کے بعد نوجوان نے لڑکی کو بالکنی سے نیچے پھینک دیا، جس سے لڑکی کی موت ہو گئی۔
انسپکٹر انجنی کمار مشرا نے بتایا کہ ایک خاندانی دوست کے گھر پر منعقد پارٹی کے بعد اتوار کی رات تقریباً 12.30 بجے اطلاع ملی کہ لڑکی بالکنی سے گر کر مر گئی ہے۔ پولیس ٹیم نے موقع پر پہنچ کر تفتیش شروع کر دی۔ ابتدائی تفتیش کے دوران معلوم ہوا کہ لڑکی اپنے دوست کے ساتھ کھڑی ہو کر باتیں کر رہی تھی کہ اچانک نیچے گر گئی۔
ابتدائی تحقیقات کے بعد پتہ چلا کہ شراب پینے کے بعد لڑکی بالکنی میں اچانک اپنا توازن کھو بیٹھی اور نیچے گر گئی۔ لیکن لڑکی کی ماں نے سمیر ورما اور شبھم رائے کے خلاف اس واقعے کو قتل قرار دیتے ہوئے ایک رجسٹرڈ شکایت درج کرائی ہے۔ انہوں نے بتایا کہ ان کی بیٹی کو سازش کے تحت قتل کیا گیا ہے۔ واقعہ کے وقت دونوں ملزمان نشے میں تھے اور بیٹی کے ساتھ بدتمیزی کی کوشش کر رہے تھے۔
یہ بھی پڑھیں: گیا میں جانوروں کے محافظ شاعر خان پر جان لیوا حملہ
لڑکی کی ماں کا الزام ہے کہ شبھم رائے اور سمیر سنگھ نے ہوس پوری نہ ہونے کی وجہ سے جان بوجھ کر ان کی بیٹی کو نویں منزل سے گرایا۔ جس کی وجہ سے اس کی موت ہو گئی۔ جمعرات کو خاتون کی شکایت کی بنیاد پر پولس نے شبھم رائے کو جی 20 چوراہے کے قریب سے گرفتار کیا اور اسے جیل بھیج دیا۔ پولیس کے مطابق ملزم سمیر کی تلاش جاری ہے۔
