امراوتی: آندھرا پردیش حکومت سرکاری طور پر اس مہینے کی 27 تاریخ کو پدم وبھوشن راموجی راؤ کی یاد میں ایک تعزیتی پروگرام کا اہتمام کرنے والی ہے۔ حکومت نے اسے ریاستی سطح کی تقریب قرار دیتے ہوئے ایک میمورنڈم بھی جاری کیا ہے۔ ریاستی پروگرام کے طور پر منعقد ہونے والی اس تقریب کے لیے 5 وزراء اور 12 عہدیداروں پر مشتمل دو کمیٹیاں بھی تشکیل دی گئی ہیں۔
وزراء کی کمیٹی میں کے پارتھا سارتھی، نادیندالا منوہر، ستیہ کمار، کولو رویندرا اور نیملا رامانائیڈو شامل ہیں اور سی آر ڈی اے کمشنر کٹاما بھاسکر کی صدارت میں 12 افسران کی ایک کمیٹی تشکیل دی گئی ہے۔ وزراء کی کمیٹی نے کرشنا ضلع کے کنور میں منعقدہ یادگاری میٹنگ کی کے لیے تیار کیے جارہے پنڈال کا جائزہ لیا۔
اس دوران وزراء کی کمیٹی نے پروگرام کے انتظام پر تبادلہ خیال کیا۔ کمیٹی کی میٹنگ میں آندھرا پردیش کے چیف منسٹر چندرا بابو نائیڈو سمیت کئی وزراء موجود تھے۔ ذرائع کے مطابق اس پروگرام میں وزیراعلیٰ چندرابابو نائیڈو، راموجی راؤ کے اہل خانہ، مرکزی وزیر اطلاعات، ایڈیٹرز گلڈ اور ممتاز صحافیوں سمیت تقریباً 7 ہزار افراد کو مدعو کیا گیا ہے۔ اس کے علاوہ فلمی دنیا کے کئی فنکار بھی اس پروگرام میں موجود ہوں گے۔
کمیٹی کی جانب سے دی گئی معلومات کے مطابق فن کی دنیا کی کئی نامور شخصیات، صحافی اور کسانوں کے نمائندے بھی اس پروگرام میں شرکت کریں گے۔ اس بات کو یقینی بنانے کے لیے پاس بھی جاری کیے گئے ہیں تاکہ آنے والے کسی بھی شخص کو کسی قسم کی پریشانی کا سامنا نہ کرنا پڑے۔ اس پروگرام میں مقامی لوگ بھی حصہ لے سکتے ہیں۔
جلسہ گاہ میں آنے والوں کے لیے بغیر کسی پریشانی کے گاڑیوں کی پارکنگ کا انتظام کیا گیا ہے۔ یادگاری اجلاس میں راموجی راؤ کی زندگی سے متعلق ایک مختصر فلم دکھائی جائے گی۔ واضح رہے کہ راموجی گروپ کے بانی و چیئرمین راموجی راؤ کا 8 جون کو انتقال ہوگیا۔
