بارہمولہ : شمالی کشمیر کے ضلع بارہمولہ کے ڈگری کالج میں آج نیشنل کانفرنس کی جانب سے کارکنوں کےلئے کنونشن منعقد کیا گیا جس میں نیشنل کانفرنس کے سینئر لیڈر اور سابق وزیر اعلیٰ عمر عبداللہ کے علاوہ پارٹی کے امیدوار جاوید بیگ نے شرکت کی۔ پارٹی کارکنوں اور حامیوں کے ایک بڑے اجتماع سے خطاب کرتے ہوئے عمر عبداللہ نے بہتر حکمرانی، ترقی اور عوام کی فلاح و بہبود کو یقینی بنانے کے لیے پارٹی کے عزم کا اظہار کا۔ انہوں نے کہا کہ نیشنل کانفرنس کی حکومت بنی تو صحت کے شعبہ کی حالت کو بہتر بنایا جائے گا اور ضلع کو ترقی دی جائے گی۔
انہوں نے بڑا وعدہ کرتے ہوئے کہا کہ اگر پارٹی اقتدار میں آتی ہے تو ہر گھر کو سالانہ 12 گیس سلنڈر مفت فراہم کئے جائیں گے۔ انہوں نے عوامی بہبود پر پارٹی کی توجہ کا اعادہ کیا اور لوگوں پر زور دیا کہ وہ ایک بہتر اور روشن مستقبل کے لیے نیشنل کانفرنس کا ساتھ دیں۔ انہوں نے کہا کہ ’میری آپ سے اپیل ہے کہ اپنا ووٹ نیشنل کانفرنس کے حق میں ڈالیں۔ ہم جیت جاتے ہیں تو تمام زیر التواء ترقیاتی کام بغیر کسی تاخیر کے مکمل ہو جائیں گے اور بارہمولہ میں بے مثال ترقی دیکھنے کو ملے گی‘۔
حلقہ سے این سی امیدوار جاوید بیگ نے بھی اس موقع پر خطاب کرتے ہوئے پارٹی کارکنوں کا شکریہ ادا کیا اور کہا کہ لوگوں کو اس بات یقین دلایا جائے کہ پارٹی پر ان کا بھروسہ بارہمولہ کی ترقی اور خوشحالی کا باعث بنے گا۔ کنونشن کے بعد عمر عبداللہ نے میڈیا سے بات کرتے ہوئے اسرائیل کی جانب سے غزہ پر کی جارہی بمباری کی مذمت کی۔ انہوں نے کہا کہ فلسطین میں حالات بدترین ہوتے جارہے ہیں۔
