راجوری: سرحدی ضلع راجوری ضلع کے تھانہ منڈی شاردا شریف علاقے میں نامعلوم بندوق برداروں نے پیر کی شام ٹریٹرول فوجی جوان کے گھر پر اندھا دھند فائرنگ شروع کر دی جس کے نتیجے میں فوجی اہلکار کا بھائی گولیاں لگنے سے برسر موقع ہی ہلاک ہو گیا۔ معلوم ہوا ہے کہ فائرنگ کے بعد سکیورٹی فورسز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دیے ہیں۔
اطلاعات کے مطابق راجوری کے شاردا شریف علاقے میں پیر کی شام اس وقت سنسنی پھیل گئی جب مشتبہ عسکریت پسندوں نے ٹریٹوریل آرمی میں تعینات فوجی اہلکار کے گھر میں گھس کر فائرنگ شروع کر دی۔ معلوم ہوا ہے کہ فائرنگ کے اس واقعے میں آرمی جوان کا بھائی شدید طورپر زخمی ہو گیا۔ گرچہ اس کو علاج و معالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے اسے مردہ قرار دے دیا۔ متوفی کی شناخت 40 سالہ محمد رزاق ولد محمد اکبر کے طور پر ہوئی ہے۔ متوفی محکمہ سماجی بہبود میں ملازم تھے۔
مزید پڑھیں: شوپیاں میں غیر ریاستی ٹورسٹ گائیڈ پر مسلح افراد کا حملہ
دریں اثنا سکیورٹی فورسز نے آس پاس علاقوں کو محاصرے میں لے کر حملہ آوروں کی بڑے پیمانے پر تلاش شروع کی ہے۔ ذرائع نے بتایا کہ راجوری میں ہائی الرٹ جاری کیا گیا ہے تاکہ حملہ آوروں کو جلد از جلد انجام تک پہنچایا جاسکے۔
