کشمیری پنڈتوں کا محبوب تہوار 'ہیرتھ' کی چار روزہ روایتی تقریبات کا آغاز سرینگر: کشمیری پنڈتوں کے محبوب تہوار 'ہیرتھ' کی چار دنوں پر محیط روایتی تقریبات جمعے کے روز سے شروع ہو گئی ہیں۔اس تہوار کو بھارت، پڑوسی ممالک بشمول سری لنکا، نیپال، پاکستان میں مقیم ہندو برادری 'مہا شیو راتری' کے نام سے مناتی ہے۔
ہندو مذہب کے مطابق یہ تہوار بھگوان شیو اور دیوی پاروتی کی شادی کی خوشی میں منایا جاتا ہے۔ تاہم کشمیری پنڈت برادری کا اس مذہبی تہوار (مہاشیو راتری یا ہیرتھ) کو منانے کا طریقہ بالکل مختلف ہے۔
کشمیری پنڈت برادری اس تہوار کی تقریبات کا آغاز خصوصی پوجا جو کشمیری پنڈتوں کے ہاں 'وٹک پوجا' کے نام سے جانی جاتی ہے، سے کرتی ہے جس کے لئے مخصوص قسم کے برتنوں اور خشک پھلوں کا استعمال کیا جاتا ہے۔ اس خصوصی پوجا کا اہتمام کشمیری پنڈت اپنے گھروں میں ہی کرتے ہیں۔
ایک کشمیری پنڈت ونود بٹ نے بتایا کہ اس تہوار کی تقریبات 21 دن تک جاری رہتی ہیں جن کا آغاز 'وٹک پوجا' سے ہو چکا ہے۔انہوں نے کہا کہ اس تہوار کے چوتھے دن پرشاد کی تقسیم ہوگی۔ کشمیر میں یہ تہوار گھروں میں ہی منایا جاتا ہے اور پوجا پاٹ بھی گھروں میں ہی ہوتی ہے۔
تاہم کشمیری پنڈت کے مطابق اس تہوار کی روایتی رونق غائب ہے، کیونکہ نوے کی دہائی سے قبل جب کشمیری پنڈت یہ تہوار دیہی علاقوں میں اپنے گھروں میں مناتے تھے تو ہمارے گھروں پر مبارکباد دینے کے لئے پڑوسی مسلمانوں کا تانتا بندھا رہتا تھا۔
کشمیری پنڈتوں کا محبوب تہوار 'ہیرتھ' کی چار روزہ روایتی تقریبات کا آغاز
ان کا کہنا تھا کہ 'اس تہوار کی ماضی میں ایک الگ رونق تھی۔ دیہی علاقوں میں کاریگروں اور دیگر چھوٹے چھوٹے تاجروں کے کام میں اس تہوار کے موقع پر کئی گنا اضافہ ہوجاتا تھا۔ہمارے گھروں پر پڑوسی مسلمانوں کا تانتا بندھا رہتا تھا جو مبارکباد دینے کے لئے آتے تھے۔ اب وہ رونق غائب ہے لیکن اب جو چیز باقی ہے وہ موبائل فون پر مبارکباد دینا ہے'۔
بتادیں کہ وادی میں سنہ 1989 میں حالات خراب ہونے کے بعد بیشتر کشمیری پنڈت ملک کے مختلف شہروں بالخصوص جموں ہجرت کر گئے۔ تاہم جو پنڈت گھرانے یہی رہیں وہ دیہی علاقوں سے شہری علاقوں کی طرف ہجرت کر گئے اور ان میں سے بیشتر گھرانے آج کل حکومت کی طرف سے بنائی گئی پنڈت کالونیوں میں رہ رہے ہیں۔
آج جب مہاجر کشمیری پنڈت اس تہوار کو مناتے ہیں تو وادی کے مختلف علاقوں سے تعلق رکھنے والے کشمیری مسلمان اخروٹ ساتھ لیکر اپنے پنڈت بھائیوں کو سلام کے موقع پر مبارک باد پیش کرنے کے لئے پہنچ جاتے ہیں۔
جموں میں رہائش اختیار کرچکے ایک کشمیری پنڈت نے بتایا کہ ہندوﺅں میں صرف کشمیری پنڈت وٹک پوجا کا اہتمام کرتے ہیں۔ان کا کہنا تھا: 'اس خصوصی پوجا کا سلسلہ غروب آفتاب سے شروع ہو کر رات دیر گئے تک جاری رہا۔ وٹک پوجا بھگوان شیو اور دیوی پاروتی کی شادی تقریب کی علامت ہے'۔
مذکورہ مہاجر پنڈت نے بتایا کہ مجموعی طور پر سارے ہندو مہاشیوراتری یا ہیرتھ کا تہوار مناتے ہیں مگر ان کا اورہمارا اس تہوار کو منانے کا طریقہ بالکل مختلف ہے۔
کشمیری پنڈتوں کو چھوڑ کر دوسرے ہندو اس تہوار کے موقع پر مندروں میں جا کر پوجا کرتے ہیں جبکہ ہم اس تہوار سے متعلق خصوصی وٹک پوجا کا اہتمام اپنے گھروں میں ہی کرتے ہیں۔انہوں نے 'وٹک پوجا' کے طریقہ کار کے بارے میں کہا: 'ہم دولہا دلہن (بھگوان شیو اور دیوی پاروتی) کی علامت کے طور پر دو برتن پوجا کے وقت سامنے رکھتے ہیں۔
انیس سو نوے کی دہائی کے شروع ہونے سے قبل ہم اس پوجا کے لئے مٹی کے برتن (مٹکے) استعمال میں لاتے تھے چونکہ ایسے برتنوں کو اب حاصل کرنا مشکل ہوگیا ہے تو آج المونیم یا اسٹیل کے برتن استعمال میں لائے جاتے ہیں۔ دو بڑے برتنوں کے علاوہ چار یا چھ چھوٹے چھوٹے برتن بھی پوجا کے وقت سامنے رکھے جاتے ہیں جن کو باراتیوں کی علامت تصور کیا جاتا ہے۔
اس کے علاوہ شادی کی رسم انجام دینے کے لئے ایک گرو اور حفاظت کے لئے دو محافظوں کی علامت کے طور پر تین مزید برتن رکھے جاتے ہیں۔ اس پوجا میں زیادہ سے زیادہ گیارہ برتنوں کا استعمال کیا جاتا ہے جو مختلف لوگوں کی علامت ظاہر کرتے ہیں'۔
وادی میں اس تہوار کے حوالے سے بھیگے ہوئے اخروٹوں کا پرشاد اور مچھلیوں کا سالن بہت ہی مشہور ہے۔ایک کشمیری پنڈت نے بتایا کہ وٹک پوجا کے لئے استعمال ہونے والے برتنوں میں اخروٹ، بادام اور دوسرے خشک پھلوں کی گریاں رکھی جاتی ہیں جو تہوار کے چار دنوں کے بعد پرشاد کے طور پر رشتہ داروں اور پڑوسیوں میں تقسیم کیا جاتا ہے۔
انہوں نے کہا کہ اس پرشاد میں سے ایک بڑا حصہ بیاہی گئی عورتوں کے وہاں بھیجا جاتا ہے۔جنوبی ہند میں رہائش اختیار کرچکے ایک کشمیری پنڈت نے بتایا کہ شیوراتری جسے کشمیری میں ہیرتھ کہتے ہیں، کشمیری پنڈتوں کا سب سے بڑا تہوار ہے۔ اس تہوار کے موقع پر ہمیں اپنے مادر وطن، کشمیری پڑوسیوں اور دوستوں کی بے حد کمی محسوس ہو رہی ہے۔
دریں اثنا شیوراتری کے تہوار کے سلسلے میں جمعے کو وادی میں قائم مندروں میں خصوصی پوجا پاٹ کا اہتمام کیا گیا، جس میں کشمیری پنڈتوں کی ایک بڑی تعداد نے شرکت کی۔
سب سے بڑی تقریبات سرینگر کے ہنومان مندر، رام مندر اور شنکر آچاریہ مندر میں منعقد ہوئیں۔سرینگر میں زبرون پہاڑی سلسلہ پر واقع شنکر آچاریہ مندر کو 'شیوراتری' کے پیش نظر برقی قمقموں سے سجایا گیا تھا۔ اس مندر پر جمعے کی صبح سے سینکڑوں کی تعداد میں ہندو مذہب کے پیروکاروں نے حاضری دی جنہیں 'ہر ہر مہا دیو، بم بم بھولے، جے بھولے ناتھ' جیسے نعرے لگاتے ہوئے سنا گیا۔
اس مندر پر جہاں مختلف تنظیموں نے حاضری دینے والوں کے لئے خصوصی لنگر کا انتظام کیا تھا وہیں انتظامیہ نے بھی سکیورٹی سمیت تمام انتظامات کیے تھے۔مندر میں حاضری دینے والے ایک عقیدت مند نے کہا: 'ہم نے امن اور شانتی کے لئے دعائیں مانگی ہیں۔ ہر گھر میں شانتی رہے۔ لوگوں کو تمام دکھوں سے نجات ملے'۔
مہاشیو راتری کے تہوار کے سلسلے میں جموں بھر کے مندروں کو چراغاں کیا گیا ہے۔ شیو پاروتی مندر، شیو دھام اور دیگر مشہور مندروں کو پھول مالاﺅں اور رنگا رنگ روشنیوں سے سجایا گیا ہے۔ کشمیر انتظامیہ نے مہاشیوراتری یا 'ہیرتھ' کے تہوار کے سلسلے میں پنڈت برادری والے علاقوں میں معقول انتظامات کیے تھے۔ محکمہ فشریز کی طرف سے ٹراوٹ فش کی خریداری کے لئے سیل مراکز قائم کیے گئے تھے۔
مزید پڑھیں: وادی بھر میں مہا شیوراتری کا تہوار منایا گیا
شہر کے تاریخی شری رنبیریشور مندر کو مہاشیو راتری پر شاندار طریقے سے سجایا گیا ہے۔ مہاشیو راتری پر مندر میں آنے والے عقیدت مندوں سے پہلے ہی مندر انتظامیہ نے کہا کہ عقیدت مندوں کو پانی چڑھانے کے لیے کم سے کم پانی کا استعمال کرنا چاہیے۔
قابل ذکر ہے کہ مندر میں جاری تزئین و آرائش کے کام کے پیش نظر عقیدت مندوں کو پانی چڑھانے کی اجازت نہیں دی گئی۔ لیکن شیو راتری کے پیش نظر مندر کمیٹی نے عقیدت مندوں کو پانی چڑھانے کی اجازت دے دی ہے۔ مندروں کے اندر اور باہر سیکورٹی کے سخت انتظامات کیے گئے تھے۔
