ترال(پلوامہ): بھارتیہ جنتا پارٹی کی جانب سے آج ٹاؤن ہال ترال میں ایک کنونشن کا اہتمام کیا گیا۔ اس کنونشن کی صدارت پارٹی کے ترجمان الطاف ٹھاکر نے کی۔ اس موقع پر بٹہ گنڈ ترال سے تعلق رکھنے والے سابق جیالوجی اینڈ مائننگ آفیسر بشیر احمد میر نے اپنے حامیوں سمیت بی جے پی میں شمولیت کی۔ اس موقع پر اوتار سنگھ، اعجاز احمد شاہ اور دیگر لیڈران بھی موجود تھے۔
اپنے خطاب میں الطاف ٹھاکر نے بتایا کہ جموں وکشمیر میں 2019 کے بعد حالات میں کافی سدھار آگیا ہے اور ہڑتال اور پتھراؤ اب قصہ پارینہ بن گیا ہے۔اس دوران بشیر احمد میر نے بتایا کہ انہوں نے بی جے پی کا دامن اس لیے تھام لیا، کیونکہ یہی جماعت سماج کے سبھی طبقہ جات کے لیے کام کر رہی ہے۔
مزید پڑھیں: امید ہے کہ بی جے پی جموں وکشمیر کی پارلیمانی سیٹوں پر جیت درج کریں گی: رویندر رینا
میڈیا کے ساتھ بات کرتے ہوئے الطاف ٹھاکر نے بتایا کہ بی جے پی جلد ہی لوک سبھا انتخابات کے حوالے سے جموں وکشمیر میں امیدواروں کا اعلان کرے گی۔ انہوں نے مزید بتایا کہ نریندر مودی کی زیر قیادت بی جے پی پارٹی اب کی بار چار سو سیٹیں حاصل کرے گی اور جموں وکشمیر میں بھی کنول کھلے گا۔انہوں نے دعوی کیا کہ نریندر مودی رام کی طرح پوجے جا رہے ہیں کیونکہ انہوں نے عوام کی بہبودی کے لیے بہت کام کیے ہیں
