اننت ناگ: مرکز کے زیر انتظام یوٹی جموں و کشمیر کے ضلع اننت ناگ میں بھارتیہ جنتا پارٹی کی جانب سے سرینگر میں گذشتہ روز غیر مقامی شہریوں پر ہوئے حملے کے خلاف زبردست احتجاج کیا۔ اس موقعے پر موم بتی جلوس کا بھی اہتمام کیا گیا۔
بی جے پی کے معاون انچارج رفیق وانی نے کہا کہ سرینگر میں غیر مقامی مزدوروں پر ہوئے حملے اور ہلاکت کی پرزور مذمت کرتے ہیں۔ غیر مقامی شہریوں پر حملہ کرکے ماحول بگاڑنے کی کوشش کی جارہی ہے۔ اس سے عام لوگوں میں دہشت کا ماحول پیدا ہو سکتا ہے۔ ایسے حملوں کی وجہ سے غیر مقامی مزدور جموں و کشمیر میں آنے سے کترانے لگیں گے۔ بی جے پی کی جانب سے منعقدہ موم بتی جلوس اننت ناگ کے ڈاک بنگلہ سے گزرتے ہوئے تاریخی کھنہ بل چوک پر ختم ہوا۔ اس جلوس میں بی جے پی کے کارکنان اور رہنماؤں نے بڑی تعداد میں شرکت کی۔ عام لوگوں نے بھی اس جلوس میں حصہ لیا۔
یہ بھی پڑھیں: عام شہریوں کی ہلاکت کے خلاف جموں و کشمیر کے مختلف علاقوں میں مظاہرے
ضلع صدر اننت ناگ ایڈوکیٹ سید وجاہت نے غیر مقامی شہریوں کی ہلاکت کی مذمت کرتے ہوئے کہا کہ معصوم لوگوں پر حملہ کرنا سب سے بڑا گناہ ہے۔ جن لوگوں کو ہدف بنایا جا رہا ہے وہ لوگ روزگار کی تلاش میں جموں و کشمیر آتے ہیں۔ غیر مقامی لوگوں کی حفاظت کرنا سکیورٹی یجنسیوں کے ساتھ ساتھ عام لوگوں کی بھی ذمہ داری بنتی ہے۔
