نئی دہلی: ٹرینی آئی اے ایس آفیسر پوجا کھیڈکر کے تنازعہ کو دیکھنے کے لیے مرکزی حکومت نے ایڈیشنل سکریٹری کی سطح کے ایک سینئر افسر کی صدارت میں ایک رکنی کمیٹی تشکیل دی ہے۔ یہ کمیٹی 2 ہفتوں میں اپنی رپورٹ پیش کرے گی۔
32 سالہ کھیڈکر پر انڈین ایڈمنسٹریٹو سروس میں پوزیشن حاصل کرنے کے لیے جسمانی معذوری کے زمرے اور دیگر پسماندہ طبقے (او بی سی) کوٹے کے تحت فوائد کا غلط استعمال کرنے کا الزام ہے۔
2023 بیچ کے ٹرینی آئی اے ایس افسر کو بیوروکریٹ کی حیثیت سے اپنے عہدے کا غلط استعمال کرنے کے سنگین الزامات کا سامنا ہے۔ جس کی وجہ سے پیر کے روز انھیں پونے سے واشیم منتقل کردیا گیا۔ جہاں انھوں نے جمعرات کو ودربھ خطہ کے واشیم ڈسٹرکٹ کلکٹریٹ میں اسسٹنٹ کلکٹر کے طور پر چارج سنبھالا۔
یو پی ایس سی میں پوجا کا 841 واں رینک تھا
واضح رہے کہ پوجا کھیڈکر نے یوپی ایس سی میں 841 واں رینک حاصل کیا ہے۔ جس کے بعد انہیں ایڈیشنل کلکٹر کے عہدے پر تعینات کیا گیا۔ معلومات کے مطابق انہوں نے اس عہدے پر تقرری کے بعد کئی طرح کی سہولیات کا مطالبہ کیا تھا۔ قابل ذکر ہے کہ کھیڈکر کے والد ایک ریٹائرڈ افسر ہیں۔
