احمد آباد: وزیر اعظم نریندر مودی نے منگل کو لوک سبھا انتخابات 2024 کے تیسرے مرحلے میں ووٹ ڈالا۔ پی ایم مودی نے گجرات کے احمد آباد میں ایک پولنگ بوتھ پر اپنا ووٹ ڈالا۔ وزیر داخلہ امت شاہ بھی ان کے ساتھ تھے۔ اس دوران پولنگ اسٹیشن پر سکیورٹی کے سخت انتظامات کئے گئے تھے۔ اس موقع پر پی ایم مودی نے عوام سے ووٹ ڈالنے کی اپیل کی۔ انہوں نے کہا کہ یہ عام ووٹنگ نہیں ہے۔
اپنا ووٹ ڈالنے کے بعد پی ایم مودی نے کہا کہ، "آج ووٹنگ کا تیسرا مرحلہ ہے۔ ہمارے ملک میں 'دان' کی بہت اہمیت ہے اور اسی جذبے کے تحت، ہم وطنوں کو زیادہ سے زیادہ ووٹ ڈالنا چاہیے۔ابھی 4 راؤنڈ باقی ہیں۔ گجرات میں ایک ووٹر کے طور پر، یہ واحد جگہ ہے جہاں میں باقاعدگی سے ووٹ دیتا ہوں اور امت بھائی یہاں سے بھارتیہ جنتا پارٹی کے امیدوار کے طور پر الیکشن لڑ رہے ہیں۔
اپنا ووٹ ڈالنے کے بعد، پی ایم مودی نے کہا کہ، "ہندوستان کا انتخابی عمل، انتخابی انتظام دنیا کی جمہوریتوں کے لیے ایک مثال ہے جس سے سیکھنا چاہیے۔ دنیا کی بڑی یونیورسٹیوں کو اسے اسٹڈی کرنا چاہیے۔ تقریباً 64 ممالک میں انتخابات ہوتے ہیں اور ان کا موازنہ ہونا چاہیے۔ ان سب میں سے یہ سال جمہوریت کے جشن جیسا ہے، میں ایک بار پھر اہل وطن سے کہتا ہوں کہ بڑی تعداد میں ووٹ ڈالیں اور جمہوریت کا تہوار منائیں۔
وزیر اعظم نریندر مودی نے آج صبح گجرات کے احمد آباد میں نشان ہائر سیکنڈری اسکول میں اپنا ووٹ ڈالا۔ پی ایم مودی نے ووٹ ڈالنے کے بعد لوگوں کو مبارکباد دی۔ اس دوران انہوں نے اپنی سیاہی والی انگلی میڈیا کو دکھائی۔ اس کے بعد وہ اپنے مداحوں کے درمیان پیدل چلے گئے۔ امیت شاہ بھی ان کے ساتھ تھے۔ امت شاہ نے بھی لوگوں سے ہاتھ ملایا۔ پی ایم مودی نے ایک بچے کی طرف سے تیار کردہ اپنے پورٹریٹ پر دستخط کئے۔ اسی دوران بزرگ خاتون نے پی ایم کو راکھی باندھی۔
پی ایم مودی اور امت شاہ دونوں پولنگ بوتھ پر کافی خوش مزاج نظر آئے۔ دونوں کے چہروں پر خوشی عیاں تھی۔
پی ایم مودی کے پولنگ اسٹیشن پہنچنے سے پہلے ہی امت شاہ پولنگ اسٹیشن پہنچ گئے تھے۔ پی ایم مودی کے یہاں پہنچنے پر ان کا استقبال کیا۔ اس دوران گجرات کے وزراء بھی موجود تھے۔ وزیر اعظم کے دورے کے پیش نظر پولنگ بوتھ کے اندر اور اطراف میں سیکورٹی کے سخت انتظامات کیے گئے تھے۔ آپ کو بتا دیں کہ لوک سبھا انتخابات 2024 کے تیسرے مرحلے میں 11 ریاستوں میں 93 لوک سبھا سیٹوں پر ووٹنگ ہو رہی ہے۔ ملک میں سات مرحلوں میں انتخابات ہوں گے۔ ووٹوں کی گنتی 4 جون کو ہوگی۔
