نئی دہلی: امسال فریضہ حج کی ادائگی کے لیے مکہ جانے والے 98 بھارتی شدید گرمی کی وجہ سے جاں بحق ہوگئے۔ وزارت خارجہ کے ترجمان رندھیر جیسوال نے کہا کہ اس سال ایک لاکھ 75 ہزار بھارتی حج کے لیے مکہ گئے تھے۔ حج کا سفر 9 مئی سے 22 جولائی تک ہے۔ اس سال اب تک 98 اموات کی اطلاع ملی ہے۔
جیسوال نے اپنی ہفتہ وار میڈیا بریفنگ میں کہا، "یہ تمام اموات قدرتی وجوہات، بیماریوں اور بڑھاپے کی وجہ سے ہوئی ہیں۔ عرفات کے دن چھ عازمین حج کی موت ہوئی۔" میڈیا رپورٹ کے مطابق جاں بحق ہونے والوں میں مصری عازمین کی تعداد سب سے زیادہ ہے۔
واضح رہے کہ مکہ میں امسال درجہ حرارت 50 ڈگری سے تجاوز کرگیا ہے۔ حال ہی میں شائع ہونے والی ایک رپورٹ میں کہا گیا ہے کہ موسمیاتی تبدیلیوں کی وجہ سے حج کا سفر تیزی سے متاثر ہو رہا ہے۔ رپورٹ میں مزید کہا گیا ہے کہ جس علاقے میں عازمین حج مناسک حج ادا کرتے ہیں وہاں درجہ حرارت ہر دہائی میں 0.4 ڈگری سیلسیس بڑھ رہا ہے۔
حج 2024 میں عازمین حج کی تعداد
سعودی حج حکام کے مطابق، 2024 میں 1.83 ملین سے زائد مسلمانوں نے حج ادا کیا، جن میں 22 ممالک کے 1.6 ملین سے زائد عازمین اور تقریباً 2,22,000 سعودی شہری اور رہائشی شامل تھے۔
