حیدرآباد (نیوز ڈیسک) یوم اطفال کے موقعے پر ملک بھر کے تعلیمی اداروں میں آنجہانی وزیر اعظم پنڈت جواہر لعل نہرو کی وراثت کا جشن منایا جاتا ہے۔ نہرو آزاد ہندوستان کے پہلے وزیر اعظم تھے جنہوں نے بچوں سے اور بچوں نے ان سے خوب پیار کیا۔
قومی یوم اطفال اس خیال کی بھی نمائندگی کرتا ہے کہ تمام بچوں کو، ان کی ذات برادری، مذہب، سماجی و اقتصادی حیثیت یا سیاسی حیثیت سے قطع نظر، صحت کی دیکھ بھال، تعلیم اور صفائی ستھرائی سمیت ضروری سہولیات تک رسائی کا یکساں حق حاصل ہو۔
یوم اطفال کا تاریخی پس منظر
1947 کے بعد سے جواہر لال نہرو کی سالگرہ ایک عوامی تقریب کے طور پر منائی جاتی رہی ہے جس میں بچوں میٹنگز کرتے ہیں، گیمز کھیلتے ہیں اور دیگر تقریبات میں پرفارم کرتے ہیں۔ 1957 میں ہندوستان کی انگریزوں سے آزادی کے 10 سال بعد حکومت ہند نے سرکاری طور پر 14 نومبر کو یوم اطفال کے طور پر منانے کا اعلان کیا۔
بچے چاچا جی کو پسند کرتے تھے
بچوں کا دن نہرو کو خراج تحسین پیش کرنے کے لیے منایا جاتا ہے، جنہیں چھوٹے بچوں سے بہت پیار تھا اور بچے بھی انہیں پیار سے 'چاچا نہرو' کہتے تھے۔ نہرو کی پیدائش 14 نومبر 1889 کو ہوئی تھی اور وہ بچوں سے پیار کی وجہ سے مشہور تھے۔ انہوں نے 1955 میں چلڈرن فلم سوسائٹی انڈیا بنیاد رکھی تاکہ خصوصی طور پر بچوں کے لیے دیسی سنیما بنایا جا سکے۔ وہ بچوں کے حقوق اور ایک ایسے ہمہ گیر تعلیمی نظام کی بڑھ چڑھ کر وکالت کرتے تھے جہاں علم سب کے لیے قابل رسائی ہو۔
چاچا جی نام کیسے آیا؟
نہرو کو 'چاچا جی' کہنے کی کوئی دستاویزی وجہ نہیں ہے۔ تاہم کہا جاتا ہے کہ اس اصطلاح کے رائج ہونے کے پیچھے بچوں سے ان کی محبت ایک بڑی وجہ تھی۔ ایک اور مشہور ورژن یہ ہے کہ نہرو مہاتما گاندھی کے بہت قریب تھے، جنہیں وہ اپنا بڑا بھائی سمجھتے تھے۔ جہاں گاندھی کو 'باپو' کے نام سے جانا جاتا تھا، وہیں نہرو کو 'چاچا جی' کے نام سے جانا جاتا تھا۔
بچوں پر نہرو کے پانچ اقوال
1- "آج کے بچے کل کا ہندوستان بنائیں گے۔ جس طرح ہم ان کی پرورش کریں گے وہ ملک کا مستقبل طے کرے گا۔"
2- "ان (بچوں) کی اصلاح کا واحد طریقہ یہ ہے کہ انہیں پیار سے جیت لیا جائے۔ جب تک کوئی بچہ دوستانہ نہیں ہے، آپ زبردستی اس کی رہنمائی نہیں کر سکتے۔"
3- "بچے باغ کی کلیوں کی طرح ہوتے ہیں اور ان کی پرورش احتیاط اور پیار سے کی جانی چاہیے، کیونکہ وہ قوم کے مستقبل اور آنے والے کل کے شہری ہیں۔"
4- "بھارت میں بچوں کی بڑی فوج، کم از کم ظاہری طور پر، عدم تحفظ کے احساس یا یقین دہانی کی کمی کا شکار نظر نہیں آتی۔"
5- "کسی قوم کے بچے اس کی طاقت ہوتے ہیں۔ وہی لوگ ہوتے ہیں جو ماضی کی میراث کو آگے بڑھاتے ہیں اور اس کے نظریات کو حقیقت میں ڈھالتے ہیں۔"
یوم اطفال پر دیکھنے لائق پانچ فلمیں
1- دی ریڈ بلون (The Red Balloon) 1956، از البرٹ لاموریسی
2- گریو آف دی فائر فلائز (Grave of the Fireflies) 1988، از اساؤ تاکاہاٹا
3- چلڈرن آف ہیون (Children of Heaven) 1997، از ماجد مجیدی
4- ویئر از دی فرینڈس ہاؤس (Where Is the Friend's House?) 1987، از عباس کیاروستامی
5- ٹرٹلس کین فلائی (Turtles Can Fly) 2004، از بہمن غوبادی
یہ بھی پڑھیں: پی ایم مودی نے جواہر لال نہرو کو ان کی یوم پیدائش پر خراج عقیدت پیش کیا
