కాసులు కొడితేనే...పేదలకు ఇళ్ల పట్టాలు..!

అర్హులందరికీ ఇళ్లపట్టాల పంపీణీ అందని ద్రాక్షగానే మిగలనుంది. అందరీకి ఇళ్లపట్టాలు ఇస్తామని ప్రభుత్వం చెబుతున్నా... కొందరికి మాత్రమే ఈ అవకాశం దక్కుతోంది. అనర్హులైన పలువురు ఇళ్లపట్టాలను దర్జాగా పొందుతున్నారు. అధికార పార్టీకి చెందిన స్థానిక నాయకుల కనుసన్నలలో జాబితాలు వెలువడుతుండటం వల్ల... అనేకమంది నిరుపేదలకు నష్టం వాటిల్లుతోంది.

పశ్చిమగోదావరి జిల్లాలో ఇళ్ల పట్టాల పంపిణీలో అనేక అక్రమాలు చోటుచేసుకొంటున్నాయి. సిఫార్సులు, పైరవీలు, మామూళ్లతో అనర్హులకు సైతం ఇంటి స్థలాలు అందిస్తున్నారు. ఎన్నో ఆశలతో ఎదురుచూస్తున్న పేదలకు మాత్రం పట్టాలు అందడం లేదు.

ఈమె పేరు వరలక్ష్మీ.. పశ్చిమగోదావరి జిల్లా పెనుగొండ మండలం రామన్నపాలెం గ్రామానికి చెందిన మహిళ. భర్త చనిపోవటంతో తన ఇద్దరు చిన్నపిల్లల్ని తన రెక్కల కష్టంతో పోషించుకొంటోంది. ఇల్లులేని వరలక్ష్మీ... ప్రభుత్వం అందించే ఇంటి స్థలం కోసం దరఖాస్తు చేసుకుంది. అయితే ఇంటి స్థలం కావాలంటే 60వేల రూపాయలు మామూళ్లు ఇవ్వాలని స్థానిక నాయకులు డిమాండ్ చేశారు. రెండు రూపాయల వడ్డీకి అప్పుచేసి.. 60వేల రూపాయలు చెల్లించింది. తీరా స్థలాలు చేతికి వస్తాయన్న సమయంలో జాబితాలో ఆమె పేరు లేదు. చెల్లించిన డబ్బు ఇచ్చేది లేదని.. దిక్కున్న చోట చెప్పుకోమని స్థానిక నాయకులు బెదిరింపులకు దిగారని ఆమె ఆవేదన వ్యక్తం చేస్తోంది.

ఎంతోమంది..

వరలక్ష్మీలా మోసపోయిన వారు జిల్లాలో అనేక మంది ఉన్నారు. అర్హులైన నిరుపేదలకు ప్రభుత్వం అందిస్తున్న ఇంటి పట్టాల జాబితాలో చోటుండటం లేదు. నిరుపేదలైన అర్హులందరికీ ఇంటి స్థలాలు ఇస్తామని ప్రభుత్వం అంటున్నా.. క్షేత్రస్థాయిలో మాత్రం అలా జరగడం లేదు. పశ్చిమగోదావరి జిల్లాలో పలు ప్రాంతాల్లో స్థానిక నాయకులు చెప్పినవారే జాబితాలో ఉంటున్నారన్న విమర్శలూ ఉన్నాయి. పలు గ్రామాల నుంచి బాధితులు కలెక్టరేట్​కు వచ్చి ఫిర్యాదులు చేస్తుండటం ఇందుకు ఉదాహరణ.

ఫిర్యాదుల వెల్లువ

ఆచంట నియోజకవర్గంలోని పలు మండలాల ప్రజలు ఏలూరు కలెక్టరేట్​కు వచ్చి ఫిర్యాదులు చేస్తున్నారు. జంగారెడ్డిగూడెం, గోపాలపురం, పోలవరం ప్రాంతాల ప్రజల నుంచి ఫిర్యాదుల పరంపర కొనుసాగుతూనే ఉంది. అర్హులైన తమకు ఇళ్లపట్టాల జాబితాలో చోటులేకుండా చేస్తున్నారని కొందరు.. మామూళ్లు తీసుకొంటున్నారని కొందరు, పార్టీకి ఓటువేయలేదని ఇళ్లపట్టాలు ఇవ్వడంలేదని మరికొందరు ఇలా ఫిర్యాదులు చేస్తూనే ఉన్నారు. పెనుగొండ మండలం రామన్నపాలెంలో ఇంటి పట్టాకు 60 నుంచి 80వేల రూపాయలు వసూలు చేస్తున్నారని గ్రామస్తులు కలెక్టర్​కు ఫిర్యాదు చేశారంటే పరిస్థితి ఏ స్థాయిలో ఉందో అర్థం చేసుకోవచ్చు. డబ్బులు వసూలు చేస్తున్నారని పై అధికారులకు ఫిర్యాదు చేసినందుకు అర్హులైన వారి పేర్లు జాబితా నుంచి తొలగించారని కొందరు అంటున్నారు.

మరోవైపు జిల్లాలోని పేదలకు వచ్చే నెల 8న ఇళ్ల పట్టాలు అందించేందుకు అధికార యంత్రాంగం ముమ్మరంగా కసరత్తు చేస్తోంది. అయితే ఇళ్ల పట్టాల అర్హుల జాబితాపై ఉన్నతాధికారులు విచారణ చేపట్టాలని ప్రజలు కోరుతున్నారు.

ఇదీ చదవండి: