చోడవరంలో పొగమంచు సోయగాలు..
విశాఖ గ్రామీణ జిల్లాలోని చోడవరం నియోజకవర్గ కేంద్రమైన చోడవరంలో తెల్లవారుజామున దట్టమైన పొగమంచు అందాలు మనస్సును దోచుకుంటున్నాయి. దారులు సైతం కనపడని విధంగా తెల్లటి పొగమంచు దుప్పటిలా భూమిని కప్పేయడంతో వాహన చోదకులు ఇబ్బందులు పడ్డారు. కొండల్లో దాగున్న సూర్యభగవానుడు కిరణాలు.. మంచు దుప్పటిని చీల్చుకుంటూ వస్తుంటే ప్రకృతి సోయగం చూసి స్థానికులు పరవశిస్తున్నారు.
కోనసీమను కమ్మేసిన పొగమంచు..
తూర్పు గోదావరి జిల్లా కోనసీమలో మంచుదుప్పటి దట్టంగా కమ్మేసింది. మామూలుగానే ప్రకృతి సోయగాలతో ఓలలాడే కోనసీమకు.. దట్టమైన మంచు అందాలు తోడవడం మరిన్ని సొగసులు అద్దుకుంది. సూర్యుణి లేలేత కిరణాల మధ్య... పచ్చటి పొలాల్లో మంచు అందాలు చూసి తీరాల్సిందే. ఎక్కడో శీతల ప్రాంతాల్లో కనిపించే దృశ్యాలు ఆవిష్కృతమై.. ఆనందాన్ని పంచుతున్నాయి.
కడపలో కనువిందు చేసిన పొగమంచు అందాలు..
కడప జిల్లా బద్వేలును పొగమంచు కప్పేసింది. తెల్లవారుజామున 5 గంటల నుంచి 7 గంటల వరకు తెల్లటి పాల నురుగులాంటి పొగమంచు కనువిందు చేసింది. అయితే దట్టంగా అలుముకున్న పొగమంచుతో రహదారి కనిపించక వాహనాల్లో వెళ్లేందుకు వాహనదారులు ఇబ్బందులు పడ్డారు. పట్టపగలే లైట్లు వేసుకొని ప్రయాణించారు. జిల్లాలో ఇంతటి పొగమంచు అలుముకోవటం ఇదే ప్రథమమని స్థానికులు అంటున్నారు.
అనంతలో అలరించిన పొగమంచు పరువాలు..
ఎక్కడో ఊటీ, కొడైకెనాల్ వంటి శీతల ప్రాంతాల్లో కనిపించే పొగ మంచు దృశ్యాలు.. అనంతపురం జిల్లా ఉరవకొండ మండలంలో కనిపించి కనువిందు చేశాయి. అనంతపురం, బళ్ళారి 42వ జాతీయ రహదారిపై వాహనాల రాకపోకలకు తీవ్ర అంతరాయం కలిగినప్పటికీ.. రోజు చూసే ప్రాంతాలే పొగమంచు అందాలతో సరికొత్తగా కనిపించేసరికి స్థానికులు ఆ అందాలను ఆస్వాదించారు. ఉదయపు నడకకు వచ్చే వారు.. మైదాన్ని కప్పేసిన పొగమంచు అందాలు చూసి మురిసిపోయారు. పట్టణంలో ఇలాంటి సుందర దృశ్యాలను చూడటం ఇదే మొదటిసారంటూ సరికొత్త అనుభూతిని పొందారు.
ఇవీ చూడండి...
