విభజన హామీలు అమలు చేయకుండా ఏడు సంవత్సరాలుగా కాలయాపన చేసిన భాజపా ప్రభుత్వం..కాంగ్రెస్పై మాట్లాడడం దుర్మార్గమని ఏపీసీసీ అధ్యక్షుడు శైలజానాథ్ అన్నారు. ప్రధాని హోదాలో ఉన్న వ్యక్తి రాష్ట్ర విభజనపై అసంబద్ధ వ్యాఖ్యలు ఎలా చేస్తారని ప్రశ్నించారు. పార్లమెంట్లో కబుర్లు చెబితే ప్రజలు నమ్మే పరిస్థితుల్లో లేరని, ప్రధాని మోదీ వ్యాఖ్యలు అర్థరహితమని వ్యాఖ్యానించారు.
ప్రత్యేక హోదాతో పాటు పునర్విభజన సమయంలో హామీలను నెరవేర్చకుండా రాష్ట్ర ప్రజలను మోసం చేసిందన్నారు. ఆర్ఎస్ఎస్ భావజాలంతో దేశాన్ని నాశనం చేసేందుకు భాజపా ప్రయత్నిస్తోందని, ప్రత్యేక హోదాకు పంగనామాలు పెట్టిన ప్రధాని నరేంద్ర మోదీకి ప్రజలు బుద్ధి చెప్పేందుకు సిద్ధంగా ఉన్నారని స్పష్టం చేశారు. ఏ పార్టీకైనా అధికారం శాశ్వతం కాదన్న అంశాన్ని ప్రధాని మోదీ గుర్తించాలని హితవు పలికారు. దేశ స్వాతంత్య్రం కోసం పోరాడిన పార్టీ.. కాంగ్రెస్ అని, అంతటి మహోన్నత పార్టీని విమర్శించటం సరికాదన్నారు. అయినా మోదీ పాలనలో ఏం ఒరిగిందని నిలదీశారు. పారిశ్రామికవేత్తలకు మేలు చేశారే తప్ప సామాన్యులకు ఏం చేశారని నిలదీశారు.
ఇదీ చదవండి:
