ఉక్కు పరిశ్రమ ప్రైవేటీకరణకు వ్యతిరేకంగా గళమెత్తిన కార్మిక సంఘాలు

విశాఖ ఉక్కు పరిశ్రమ ప్రైవేటీకరణకు కదం తొక్కుతున్న గళాలన్నీ ఏకమయ్యాయి. కార్మిక సంఘాలన్నీ ఒక్కతాటిపైకి వచ్చాయి. రాష్ట్రవ్యాప్తంగా కార్మిక సంఘాలు దీక్ష చేపట్టాయి. విశాఖ ఉక్కు-ఆంధ్రుల హక్కు అంటూ నినదించాయి. ఈ దీక్షకు పలు రాజకీయ పార్టీల నేతలు సంఘీభావం తెలిపారు.

విశాఖ ఉక్కు పరిరక్షణ కోసం ముఖ్యమంత్రి ఆంధ్రా భవన్​లో నిరాహార దీక్ష చేయాలని... అనంతపురం జిల్లా సీపీఐ ప్రధాన కార్యదర్శి జగదీష్ డిమాండ్ చేశారు. ఏఐఎస్ఎఫ్ ఆధ్వర్యంలో అనంతపురంలోని వీకే భవన్​లో ఏర్పాటు చేసిన విశాఖ ఉక్కు పరిరక్షణ కమిటీ సదస్సులో ఆయన మాట్లాడారు. ప్రత్యేక హోదా సాధించలేని అసమర్థ ప్రభుత్వం వైకాపా అని ఆరోపించారు. విశాఖ ఉక్కును రక్షించుకోవడానికి వైకాపా.. అసెంబ్లీలో తీర్మానం చేయడానికి సంసిద్ధంగా లేకపోవడం పలు అనుమానాలకు తావిస్తోందన్నారు.

రాష్ట్రం ప్రభుత్వం భాజపాతో కుమ్మక్కై రాష్ట్రాన్ని ఆదాని, అంబానీలకు ధారదత్తం చేయడానికి కుట్ర చేస్తోందని ఎస్ఎఫ్ఐ రాష్ట్ర ప్రధాన కార్యదర్శి రమేశ్ ఆరోపించారు. కడప, విశాఖ ఉక్కు పరిశ్రమలు ప్రైవేటుపరం చేస్తూ.. కేంద్ర, రాష్ట్ర ప్రభుత్వాలు కార్మికుల జీవితాలతో ఆడుకుంటున్నాయని మండిపడ్డారు. ప్రైవేటీకరణకు వ్యతిరేకంగా ఏడు బృందాలుగా ఉద్యమాలు చేయడానికి సిద్ధమవుతున్నట్లు అనంతపురంలో జరిగిన సమావేశంలో తెలిపారు. ఈ నెల 14, 15, 16న కడపలో భారీ బహిరంగ సభ ఏర్పాటు చేస్తున్నట్లు చెప్పారు.

విజయనగరంలో...

విశాఖ ఉక్కు-ఆంధ్రుల హక్కు అని.. ప్రతి ఒక్కరూ ఉక్కు ప్రైవేటీకరణను వ్యతిరేకించాలని... మానవీయ స్వచ్ఛంద సేవా సంస్థ అధ్యక్షుడు గోవిందరాజు కోరారు. విజయనగరం జిల్లా చీపురుపల్లిలో మానవీయ స్వచ్ఛంద సంస్థ, ఐక్య ఉపాధ్యాయ సంఘం, సత్య రామా డిగ్రీ కాలేజ్ సంయుక్తంగా విశాఖ ఉక్కు ప్రైవేటీకరణకు వ్యతిరేకంగా రౌండ్ టేబుల్ సమావేశం నిర్వహించారు. ప్రత్యేక హోదా, రైల్వే జోన్ విషయంలో రాష్ట్రాన్ని కేంద్రం మోసం చేసిందని.. ఈ ప్రైవేటీకరణను ప్రతి ఒక్కరూ వ్యతిరేకించాలని గోవిందరాజు కోరారు.

విశాఖలో..

విశాఖ ఉక్కు కర్మాగారం ప్రైవేటీకరణను నిలిపివేయాలని సీపీఐ(ఎంఎల్) న్యూడెమోక్రసీ జిల్లా కార్యదర్శి ఎం.లక్ష్మి డిమాండ్ చేశారు. ఆ పార్టీ ఆధ్వర్యంలో విశాఖ జీవీఎంసీ గాంధీ విగ్రహం వద్ద నిరసన చేపట్టారు. విశాఖ ఉక్కు కర్మాగారాన్ని విదేశీ సంస్థకు కట్టబెట్టేందుకు కేంద్ర ప్రభుత్వం చేస్తున్న చర్య దుర్మార్గమైందన్నారు. ఈ విధానాన్ని ప్రతిఘటించేందుకు ప్రజలు పెద్దఎత్తున సన్నద్ధం కావాలని కోరారు.

తూర్పుగోదావరిలో..

విశాఖ ఉక్కు పరిశ్రమను ప్రైవేటుపరం చేస్తుంటే చూస్తూ ఊరుకోబోమని.. అఖిలపక్షం నాయకులు హెచ్చరించారు. తూర్పు గోదావరి జిల్లా కాకినాడలో అఖిలపక్షం ఆధ్వర్యంలో ఆందోళనలు చేపట్టారు. ఉద్యమాల ద్వారా సాధించుకున్న విశాఖ ఉక్కుకు మద్దతుగా ఉద్యమం చేపడతామన్నారు. ప్రభుత్వ రంగ సంస్థలను ప్రైవేటీకరణ చేసే ప్రయత్నాలు కేంద్రం విరమించుకోవాలని మాజీఎమ్మెల్యే వెంకటేశ్వరరావు డిమాండ్ చేశారు.

ఇదీ చూడండి: 'ప్రతిపక్షాలను కలుపుకొని కేంద్రంపై ఒత్తిడి తీసుకొస్తాం'