గుంటూరు జిల్లాలో కొవిడ్ వ్యాప్తి తీవ్రత దృష్ట్యా.. వ్యాపార వేళలను మరింతగా తగ్గించాలని ఛాంబర్ ఆఫ్ కామర్స్ నిర్ణయించింది. రాష్ట్రంలో కరోనా కేసులు ఎక్కువగా నమోదవుతున్న జిల్లాల్లో గుంటూరు మూడో స్థానంలో ఉన్నందున ఈనెల 22వ తేదీ నుంచి సాయంత్రం 6 గంటల వరకే వర్తక, వాణిజ్య కార్యకలాపాలను ముగిస్తున్నారు. అయినప్పటికీ కేసులు తగ్గకపోవడంతో.. వ్యాపార నిర్వహణ సమయాన్ని ఉదయం 6 నుంచి మధ్యాహ్నం 3 వరకు కుదిస్తూ నిర్ణయం తీసుకుంటున్నట్లు ఛాంబర్ ఆఫ్ కామర్స్ గుంటూరు జిల్లా అధ్యక్షులు ఆంజనేయులు తెలిపారు. ఇందుకు వ్యాపారులందరూ సహకరించాలని ఆయన కోరారు.
ముందుగానే గుంటూరు మిర్చి యార్డుకు సెలవులు..
గుంటూరు మిర్చి యార్డుకు మే 3 నుంచి జూన్ 6 వరకు సెలవులు ప్రకటించారు. వేసవి తాపం అధికంగా ఉండటంతో పాటు.. కరోనా కేసులు ఎక్కువ కావటంతో అధికారులు ఈ మేరకు నిర్ణయం తీసుకున్నారు. సాధారణంగా మే నెల రెండో వారం తర్వాత యార్డుకు వేసవి సెలవులు ఇవ్వాల్సి ఉండగా.. వ్యాపారులు, కమిషన్ ఏజెంట్లు, కూలీలు యార్డు ఛైర్మన్, అధికారుల్ని విజ్ఞప్తి మేరకు ఈ నిర్ణయం తీసుకున్నారు. ఈ సమయంలో అన్ని కార్యకలాపాలు నిలిపివేస్తున్నట్లు ఛైర్మన్ ఏసురత్నం, కార్యదర్శి వెంకటేశ్వరరెడ్డి తెలిపారు. రైతులు తమ పంటను అమ్ముకునేందుకు ఇబ్బంది కలగకుండా ఉండేందుకు శీతల గోదాముల్లో విక్రయాలు నిర్వహించుకునేందుకు అనుమతించారు.
