తెలంగాణలోకి ప్రవేశించిన నైరుతి రుతుపవనాలు - రాగల మూడ్రోజులు భారీ వర్షాలు - South West Monsoon Hits Telangana

South West Monsoon Hits Telangana 2024 : తెలంగాణను నైరుతి రుతుపవనాలు తాకాయి. జోగులాంబ గద్వాల జిల్లా, నాగర్‌కర్నూల్‌, నల్గొండ జిల్లాలో రుతుపవనాలు ప్రవేశించినట్లు హైదరాబాద్ వాతావరణ కేంద్రం తెలిపింది. ఈ నేపథ్యంలో మూడు రోజుల పాటు దక్షిణ జిల్లాలో వర్షాలు కురిసే అవకాశముందని ఐఎండీ ప్రకటించింది.

Southwest monsoon Rains Hit Districts Of Telangana : నైరుతి రుతుపవనాలు తెలంగాణను తాకాయి. రాష్ట్రంలో చురుగ్గా కదులుతున్న నైరుతి రుతుపవనాలు జోగులాంబ గద్వాల్, నగర్ కర్నూల్, నల్గొండలో ప్రవేశించాయి. సాధారణంగా జూన్ రెండో వారంలో తెలంగాణకు తాకుతాయి. కానీ ఈ ఏడాది వారం రోజుల ముందే వచ్చాయి. జూన్ 6వ తేదీన రూతుపవనాలు తాకుతాయని అంచనా వేసినా, మూడు రోజుల ముందే ప్రవేశించాయి.

గతేడాదితో పోల్చుకుంటే ఈ ఏడాది సాధారణంగా కంటే ఎక్కువ వర్షపాతం నమోదయ్యే అవకాశముందని వాతావరణ శాఖ తెలిపింది. ఉపరితల ఆవర్తనం కారణంగా రాష్ట్రంలో వర్షాలు కురిస్తాయని వెల్లడించింది. ఈరోజు తేలికపాటి నుంచి మోస్తరు వర్షాలు కురుస్తాయని తెలిపింది. రేపటి నుంచి వచ్చే మూడు రోజులపాటు తెలంగాణ రాష్ట్రంలోని దక్షిణ జిల్లాలో భారీ వర్షాలు కురుస్తాయని ఐఎండీ ప్రకటించింది. రెండు, మూడు మాసాలుగా అధిక ఉష్ణోగ్రతలు, వడగాల్పులు, ఉక్కపోతతో ఉక్కిరి బిక్కిరి అవుతున్న ప్రజలకు నైరుతి ఆగమనం, ప్రస్తుతం కురుస్తున్న వర్షాలు ఉపశమనం కలిగించనున్నాయి.