అమ్మా నా యూనిఫామ్ తడిసిపోతుంది- ప్లీజ్ నన్నెత్తుకోవా? - Heavy Rains Today

Heavy Rainfall in Hyderabad: భాగ్యనగరంలో పలు ప్రాంతాల్లో వర్షం దంచికొట్టింది. ఉదయం కురిసిన వానకు నగర వాసులు తీవ్ర ఇబ్బందులు పడ్డారు. వాహనదారులు వర్షంలో తడుస్తూ వారి వారి గమ్యస్థానాలకు చేరుకున్నారు. మరోవైపు బాలలు బడికి వెళ్లటానికి, వారి తల్లిదండ్రులు చిన్నపాటి యుద్ధమే చేయాల్సి వచ్చింది. ఇంతకీ ఆ సంగతేంటే చూద్దామా!

People Problems due to Heavy Rains: రాజధాని హైదరాబాద్ మహానగరంలో చినుకు పడితే చాలు చిత్తడే. అడుగు తీసి అడుగు వేయలేని పరిస్థితి. డ్రైనేజీలు జలమయంగా మారి చిన్నపాటి వాగుల్లా పొంగిపొర్లుతున్నాయి. హైదరాబాద్​లో ఇవాళ ఉదయం కురిసిన భారీ వానకు నగరం తడిసిముద్దయింది. కురిసింది కొద్ది గంటలే అయినా ప్రజల్ని నానా ఇబ్బందులు పెట్టింది. రోడ్లపై నీరు చేరడంతో వాహనదారులు తెగ ఇబ్బందులు పడ్డారు.

మరోవైపు విద్యార్థులు స్కూళ్లకు వెళ్లలేని పరిస్థితి ఎదురైంది. దీంతో చిన్నారులను బడులకు పంపేందుకు వారి తల్లిదండ్రులు ఆపోసోపాలు పడ్డారు. ఈ క్రమంలోనే యూసఫ్​గూడ శ్రీ కృష్ణానగర్​లో కొన్ని సంఘటనలు ఈటీవీ భారత్​ కెమెరాకు చిక్కాయి. తమ పిల్లలను వరదలో తడవకుండా ఎత్తుకెళ్లిన దృశ్యాలు కనిపించాయి. కాసేపు దంచికొట్టిన వానతో నగరం అస్తవ్యస్తమైంది.

Hyderabad Rains Today : సికింద్రాబాద్​లోనూ పలు ప్రాంతాల్లో వర్షం కురిసింది. రైల్వే స్టేషన్ చిలకలగూడ ప్యాట్నీ ప్యారడైజ్ బేగంపేట్ మారేడుపల్లి ప్రాంతాలలో వర్షం పడింది. అలానే కోఠి, సుల్తాన్ బజార్, అబిడ్స్, నాంపల్లి, బషీర్ బాగ్, లకిడికపుల్, ఖైరతాబాద్ హిమాయత్ నగర్, నారాయణ గూడ తదితర ప్రాంతాల్లో కూడా వర్షం భారీగా కురిసింది.