CM Jagan Bus Yatra Passengers Problems: ముఖ్యమంత్రి జగన్మోహన్ రెడ్డి మేమంతా సిద్ధం సభల వల్ల ప్రయాణికులు నానా అగచాట్లు పడాల్సి వస్తోంది. గత కొన్ని రోజుల నుంచి ఆయన పలు ప్రాంతాలలో బస్సు యాత్ర నిర్వహిస్తున్నారు. మేమంతా సిద్ధం సభలకు ప్రజలను తరలించేందుకు ఆర్టీసీ బస్సులను ఉపయోగిస్తున్నారు. ఈ మేరకు ఇవాళ మదనపల్లిలో నిర్వహిస్తున్న సభకు వివిధ జిల్లాలో నుంచి పెద్ద ఎత్తున బస్సులు తరలించారు.
దీంతో ప్రయాణికులు తీవ్ర ఇబ్బందులు పడుతున్నారు. దూర ప్రాంతాలకు వెళ్లే ప్రయాణికులు గంటల తరబడి ఎదురుచూసి చేసేదేమీ లేక వెనుదిరిగారు. చిత్తూరు జిల్లా పలమనేరు ఆర్టీసీ డిపోలో మెుత్తం 56 బస్సులు ఉండగా అందులో 40 బస్సులను మదనపల్లె సభకు తరలించారు. ముందస్తు సమాచరం లేకుండా బస్సులను తరలించడంపై ప్రయాణికులు ఆగ్రహం వ్యక్తం చేశారు. ఆర్టీసీ ఉన్నది ప్రజల కోసమా, రాజకీయ నాయకుల కోసమా అంటూ అధికారులను నిలదీశారు.
కడప డిపో నుంచి సూమారు 187 బస్సులు: మరోవైపు కడప జిల్లా నుంచి 187 బస్సులను ఏర్పాటు చేశారు. ఒక్క కడప డిపో నుంచే 35 బస్సులను సిద్ధం సభకు పంపించడంతో ప్రయాణికులు తీవ్ర అగచాట్లు పడ్డారు. బస్సులు లేక ప్లాట్ ఫామ్లు ఖాళీగా దర్శనమిచ్చాయి. ఎప్పుడో గంట తర్వాత వస్తున్న ఒక్కో బస్సు వస్తుండటంతో రద్దీ ఎక్కువగా ఉండటం వలన సుదూర ప్రాంతాలకు వెళ్లే ప్రయాణికులు తీవ్ర ఇబ్బందులు పడ్డారు. కర్నూలు అనంతపురం, చిత్తూరు తదితర ప్రాంతాలకు వెళ్లే బస్సులు సక్రమంగా రావడం లేదు. 'మేమంతా సిద్ధం' సభలు ముగిసేంతవరకు ప్రయాణికులకు ఈ తిప్పలు తప్పవని తెలుస్తోంది. చిన్న పిల్లలు, వృద్ధులు, మహిళలు పడరాని పాట్లు పడుతున్నారు.
జగన్ రోడ్షోలో డబ్బులు, మద్యం - మత్తులో వైఎస్సార్సీపీ కార్యకర్తలు - alcohol supply in cm meeting
బస్సు యాత్రతో సామాన్యుల ఇబ్బందులు: సీఎం జగన్ చేపట్టిన మేమంతా సిద్ధం బస్సు యాత్ర సైతం సామాన్య ప్రజలను తీవ్ర ఇబ్బందులకు గురి చేస్తోంది. బస్సు యాత్ర సాగుతున్న ప్రాంతంలో పోలీసుల ఆంక్షలపై ప్రజలు తిరగబడుతున్నారు. బెంగళూరు నుంచి మదనపల్లె వచ్చే కర్ణాటక ఆర్టీసీ బస్సులు కదిరి మీదుగా బళ్లారి వెళ్లాల్సి ఉంది. ప్రయాణికులతో కదిరి వైపు వెళ్లేందుకు మదనపల్లె బైపాస్‍ రోడ్డు మీదుగా కర్ణాటక బస్సు బయలు దేరింది. ఈ మార్గంలో సీఎం జగన్ బస్సు యాత్ర సాగనున్న నేపథ్యంలో వాహనాల రాకపోకలు పోలీసులు నిలిపివేశారు.
ప్రత్యామ్నాయం మార్గం ద్వారా చిన్నతిప్పసముద్రం మీదుగా అంగళ్లు ప్రాంతానికి బస్సు చేరుకుంది. అయితే అక్కడి నుంచి కదిరికి వెళ్లేందుకు పోలీసులు అనుమతించలేదు. దీంతో దాదాపు అరగంట పాటు ప్రయాణికులు బస్సులోనే వేచి చూశారు. అదే మార్గంలో సిద్ధం సభ కోసం వెళ్తున్న బస్సులు అనుమతించడంతో కర్ణాటక బస్సులో ఉన్న ప్రయాణికులు ఆగ్రహం వ్యక్తం చేశారు. వాహనాల రాకపోకలను నిలిపివేస్తున్న పోలీసులతో వాగ్వాదానికి దిగారు. మేమంతా సిద్ధం కార్యక్రమానికి వెళుతున్న బస్సులను అడ్డగించారు. వారికి సర్ది చెప్పిన పోలీసులు, అంగళ్ల మార్గం మీదుగా బస్సులు వెళ్లేందుకు అనుమతించడంతో వివాదం సద్దుమణిగింది.
