సమ్మర్ క్యాంపుల్లో ఉత్సాహంగా విద్యార్థులు- ఈత కొడుతూ కేరింతలు - SUMMER CAMP

Children Summer Camp in Guntur District : సమ్మర్​ క్యాంపుల్లో పిల్లలు ఉత్సాహంగా గడుపుతున్నారు. తమ నైపుణ్యాలకు మెరుగులు దిద్దుకుంటూ వేసవి సెలవులను సద్వినియోగం చేసుకుంటున్నారు. కొంతమంది సంగీతం, కూచిపూడి, చిత్రలేఖనం తదితర అంశాలు నేర్చుకుంటూ ఉంటే మరికొందరు ఈత కొడుతూ కేరింతలు కొడుతున్నారు.

Children Summer Camp in Guntur District : మారుతున్న జీవనశైలి, ఆరోగ్యంపై ప్రజల్లో అవగాహన పెరుగుతోంది. ఆరోగ్యాన్ని కాపాడుకోవాలనే తపన పెద్దలే కాదు చిన్నపిల్లల్లోనూ కనిపిస్తోంది. ఎప్పుడూ పుస్తకాలతో కుస్తీ పడే విద్యార్థులు ఆటవిడుపు కోసం సమ్మర్ క్యాంపుల్లో ఉల్లాసంగా, ఉత్సాహంగా గడుపుతున్నారు. శరీర దారుఢ్యాన్ని పెంపొందించుకునేందుకు క్రికెట్, వాలీబాల్, టెన్నిస్‌తో పాటు స్విమ్మింగ్‌ నేర్చుకుంటున్నారు. ఎండలో చల్లని నీటిలో ఈత కొడుతూ కేరింతలు కొడుతున్నారు.

గుంటూరులో క్రికెట్ అకాడమీలు, టెన్నిస్ శిక్షణా కేంద్రాల్లో నిర్వహిస్తున్న ప్రత్యేక వేసవి శిక్షణా తరగతులకు విశేష స్పందన వస్తోంది. అయితే ఎన్ని రకాల క్రీడలు ఆడినా వివిధ వ్యాయామాలు చేసినా దక్కని చక్కటి ఫలితం ఈత వల్లే సాధ్యమవుతోంది. దీంతో స్విమ్మింగ్ నేర్చుకునేందుకు విద్యార్థులు అమితాసక్తి చూపుతున్నారు. చిన్నారులతో ఎన్టీఆర్​ మున్సిపల్ స్టేడియంలోని స్విమ్మింగ్ పూల్ కిటకిటలాడుతోంది. నగరంలో ఉన్న వాటిలో ఇదే కాస్త పెద్దది కావడంతో విపరీతమైన రద్దీ ఏర్పడింది. ఈత కొలనులో రోజుకు 250 మందికి ఈత నేర్పే అవకాశం ఉండగా అంతకుమించి సుమారు 500 మందికి పైగా చిన్నాపెద్దా తేడా లేకుండా స్విమ్మింగ్‌ సాధన చేసేందుకు క్యూ కడుతున్నారు. ఉదయం 6 గంటల నుంచి రాత్రి 9 గంటల వరకూ ఈత కొలను కిక్కిరిసిపోతోంది.

గుంటూరులో 10 లక్షలకు పైగా జనాభా ఉండగా నగరపాలక సంస్థ ఆధ్వర్వంలో కేవలం ఒక స్విమ్మింగ్ పూల్ మాత్రమే ఉంది. శ్యామలా నగర్‌లో ఉన్న ఎన్టీఆర్ మున్సిపల్ స్టేడియంలోని ఈతకొలను రెండున్నర ఎకరాల్లో విశాల ప్రాంగణంలో ఉంది. 25 మీటర్ల ప్రధాన ఈతకొలనుతో పాటు చిన్నారుల కోసం బేబీ పూల్ కూడా ఉంది. అంతేకాదు ప్రైవేట్ స్విమ్మింగ్ పూల్స్‌ అన్నింటికంటే ఇక్కడ ఫీజు కూడా కాస్త తక్కువే. 14 ఏళ్ల పిల్లలకు 1200, పెద్దలకు 1500 రూపాయలు వసూలు చేస్తుండటంతో ఎక్కువ మంది ఇక్కడే శిక్షణ తీసుకునేందుకు మెుగ్గు చూపుతున్నారు. ఇతర ప్రాంతాల నుంచి కూడా వచ్చి ఇక్కడ ఈత నేర్చుకుంటున్నారు. ఈతలో వివిధ రకాల మెళకువలు నేర్చుకుంటూ చేప పిల్లల్లా ఈదేస్తున్నారు.

నిత్యం ఈత కొట్టడం వల్ల వ్యాయామమే కాదు అదనపు కొవ్వు కరిగి ఆరోగ్యంగా ఉంటారనేది వైద్యుల మాట. గుండె సమస్యలు, మానసిక అలసట, ఇతర సమస్యల నుంచి ఉపశమనం లభిస్తోంది. ఈత కొట్టడంతో ఏకాగ్రత పెరుగుతుందని విద్యార్థులు చెబుతున్నారు. అవసరాలకు అనుగుణంగా నూతన స్విమ్మింగ్ పూల్‌ను అందుబాటులోకి తేవాలని తల్లిదండ్రులు కోరుతున్నారు.

స్విమ్మింగ్ పూల్‌లో ప్రధాన కోచ్, మహిళా కోచ్, ఇద్దరు లైఫ్ గార్డులతో పాటు మరో ముగ్గురు రెగ్యులర్ సిబ్బంది అందుబాటులో ఉన్నారు. వేసవి రద్దీ దృష్ట్యా ఇక్కడే తర్ఫీదు పొందిన క్రీడాకారులను వాలంటీర్లుగా వినియోగించుకుంటున్నారు. ఇక్కడికి వచ్చే వారికి జిల్లా, రాష్ట్ర స్థాయి పోటీల్లో పాల్గొనేందుకు వీలుగా ఈతలో శిక్షణ ఇస్తున్నట్లు కోచ్‌ చెబుతున్నారు.