YSRCP Leaders Atrocities on Police : అధికార పార్టీ నేతల దౌర్జన్యాలు రోజురోజుకు పెట్రేగిపోతున్నాయి. శివరాత్రి సందర్భంగా ఏర్పాటు చేసిన సాంస్కృతిక కార్యక్రమాలను వైఎస్సార్సీపీ నాయకులు ప్రచార కార్యక్రమంగా మలుచుకున్నారు. కార్యక్రమానికి ఇచ్చిన సమయం కంటే ఎక్కువ సేపు అధికార పార్టీ నేతల నిర్వహిస్తుంటే ఆపాలని పోలీసులు సూచనలు చేశారు. అంతే ఊగిపోయిన వైఎస్సార్సీపీ నేతలు పోలీసులపై దౌర్జన్యానికి దిగారు. ఎన్ని కేసులు, ఏం చేసుకుంటారో చేసుకోండి అంటూ రెచ్చిపోయారు. వీరికి ప్రభుత్వ ఉద్యోగి సైతం వత్తాసు పలకడం కొసమెరుపు.
శివరాత్రి వేడుకల నిర్వహణలో యంత్రాంగంతో పాటు ప్రజాప్రతినిధులు విఫలమయ్యారు. భక్తులు వేలాదిగా తరలివస్తారన్న సమాచారమున్నా తాగు నీటి వసతి కల్పించలేకపోయారు. ఇక ప్రకాశం జిల్లా గిద్దలూరు పట్టణంలోని పాతాళ నాగేశ్వర స్వామి దేవస్థానం ఆవరణలో మాత్రం సీఎం జగన్ మోహన్ రెడ్డి నామస్మరణలో తరించారు. శివరాత్రి సందర్భంగా ఏర్పాటు చేసిన సాంస్కృతిక కార్యక్రమాలను స్థానిక వైఎస్సార్సీపీ నాయకులు ప్రచార కార్యక్రమంగా మలుచుకున్నారు.
భూమనా ఇది తగునా? - తిరుమల పార్వేట మండపంలో వైసీపీ ప్రచారం!
అక్కడ పాటల కచేరీకి ఏర్పాటు చేసిన వేదికపై సీఎం జగన్, నియోజకవర్గ అధికార పార్టీ సమన్వయకర్త, మార్కాపురం నియోజకవర్గ ఎమ్మెల్యే కుందురు నాగార్జున రెడ్డి డిజిటల్ పోస్టర్లను ప్రదర్శించారు. తమ పార్టీని ఆదరించాలంటూ ప్రచారంతో హుకుం జారీ చేశారు. దేవస్థానంలో పార్టీ జెండాలు వెలసినా దేవాదాయ శాఖ అధికారులు మిన్నకుండిపోవడంపై భక్తులు ఆగ్రహం వ్యక్తం చేశారు. జరగబోయే సిద్ధం సభను జయప్రదం చేయాలని, 330 బస్సులు ఏర్పాటు చేశామని అన్ని వసతులు కల్పించామని తెలిపారు. ప్రతీ ఒక్కరు తప్పక హాజరై సభలు దిగ్విజయం చేయాలని, పదే పదే ప్రచార కార్యక్రమంగా పోరెత్తించారు. ఈ కార్యక్రమానికి వచ్చిన ప్రేక్షకులు ఇదేమి కర్మరా బాబు అని ఛీ కొట్టారు.
రాత్రి 12 గంటల వరకే పర్మిషన్ ఉన్నప్పటికీ ఇంకా కొనసాగిస్తుంటే పోలీసులు వచ్చి ఆపాలని అక్కడి వారికి తెలియజేశారు. వైఎస్సార్సీపీ నాయకులు పోలీసులపై దౌర్జన్యంతో 'మీ ఇష్టం వచ్చిన చేసుకో, ఎన్ని కేసులు పెట్టుకుంటావో పెట్టుకో, నీకు చేతనైనది చేసుకో, మాకు రాత్రి ఒంటిగంట వరకు అనుమతి ఉంది' అంటూ పోలీసులతో వాదనకు దిగారు. అసభ్య నృత్యాలను పోలీసులు అడ్డుకున్నారని జిల్లా సర్వశిక్షా అభియోన్లో పని చేస్తున్న ఉద్యోగి బిజ్జం రాంభూపాల్ రెడ్డి పోలీసులపై రెచ్చిపోయారు. కుందూరు నాగార్జున రెడ్డి, అతని తమ్ముని అండ చూసుకొని ఏఎస్ఐపై రెచ్చిపోయి కేసులు పెట్టుకోండి అంటూ ఆగ్రహం వ్యక్తం చేశారు.
తాము లేకుండా కార్యక్రమం ఎలా నిర్వహిస్తారు? : వైఎస్సార్సీపీ నాయకుల ఆగడాలు రోజురోజుకు శృతిమించుతున్నాయి. తాజాగా తాము లేకుండానే ఉత్సవ విగ్రహాలను రథంలోకి ఎలా తరలిస్తారంటూ ఆలయ ఈవోపై వైసీపీ నేతలు ఘర్షణకు దిగారు. ఈ ఘటన శ్రీ సత్య సాయి జిల్లా లేపాక్షిలో చోటుచేసుకుంది. ప్రఖ్యాతిగాంచిన లేపాక్షి వీరభద్ర స్వామి ఆలయంలో శివరాత్రి పండుగను పురస్కరించుకొని బ్రహ్మ రథోత్సవ వేడుకలు నిర్వహించారు. ఈ వేడుకల్లో భాగంగా శనివారం స్వామివారి బ్రహ్మరథోత్సవ కార్యక్రమానికి ఆలయం నుంచి ఉత్సవ మూర్తులను ఆలయ అధికారి రథంలోకి తీసుకొచ్చారు. అయితే స్థానికంగా ఉన్న వైసీపీ నాయకులు లేకుండానే విగ్రహాలను ఎలా తరలిస్తారని ఆలయ అధికారిపై తీవ్ర స్థాయిలో దుర్భాషలాడుతూ దాడికి యత్నించారు. సర్ది చెప్పేందుకు అక్కడికి వచ్చిన ఆలయ కమిటీ చైర్మన్ రామానందతో సైతం వాదనకు దిగారు.
