ఇండక్షన్ స్టవ్​పై వంట చేస్తున్నారా ? మీరు డేంజర్​లో ఉన్నట్టే!

పెరుగుతున్న ఇండక్షన్​ స్టవ్​ల వినియోగం - జాగ్రత్తలు తప్పక పాటించాలంటున్న నిపుణులు

Tips for Induction Stove : ప్రస్తుతం వంటింట్లో ఉపయోగించే చాలా రకాల వస్తువులు కరెంట్​తోనే పని చేస్తున్నాయి. ముఖ్యంగా అన్నం వండుకోవడానికి రైస్​ కుక్కర్, వేడి నీళ్ల కోసం ఎలక్ట్రిక్ కెటిల్, వంటలు చేయడం కోసం ఇండక్షన్​ స్టవ్​ ఎంతగానో ఉపయోగపడుతున్నాయి. LPG గ్యాస్ ధరలు పెరుగుతుండడంతో ఎక్కువ మంది ఇండక్షన్​​ స్టవ్​ వాడుతున్నారు. అలాగే ఇండక్షన్​ స్టవ్​ మీద వంటలు కూడా త్వరగా పూర్తవుతాయి. దీనివల్ల మహిళలకు వంటింట్లో చాలా సమయం కలిసి వస్తుంది. ఇలా ఇండక్షన్ స్టవ్​తో బోలేడు లాభాలున్నాయి. అయితే, మామూలు స్టవ్​తో పోలిస్తే ఇండక్షన్ స్టవ్ వాడేటప్పుడు కొన్ని జాగ్రత్తలు పాటించాలని నిపుణులు చెబుతున్నారు. లేదంటే ఒక్కోసారి కొన్ని ఇబ్బందులు ఎదురయ్యే అవకాశముంటుంది. ఈ క్రమంలో ఇండక్షన్ స్టవ్ ఉపయోగించేటప్పుడు తీసుకోవాల్సిన జాగ్రత్తలేంటో ఈ స్టోరీలో చూద్దాం.

ఇనుప టేబుల్ పైన పెట్టకండి

ఇండక్షన్ స్టవ్​ కరెంట్‌తో పని చేస్తుంది. కాబట్టి దీనిని ఇనుప టేబుల్ మీద పెట్టి వంట చేయకూడదు. ఎందుకంటే కొన్ని సార్లు అనుకోకుండా షాక్ కొట్టే ప్రమాదం ఉంటుంది. కాబట్టి ఇండక్షన్ స్టవ్​ని వీలైనంత వరకు చెక్క టేబుల్​పై పెట్టి ఉపయోగించడం మంచిది. అలాగే సెరామిక్ టైల్స్, సిమెంట్ ఫ్లోర్ పైన కూడా పెట్టుకోవచ్చు.

గ్యాస్ స్టవ్ పక్కన వద్దు

కొందరు తెలిసో తెలియకో ఇండక్షన్ స్టవ్​ని గ్యాస్ స్టవ్ పక్కన పెడుతుంటారు. అయితే ఇలా గ్యాస్ స్టవ్ పక్కన ఇండక్షన్ స్టవ్​ని పెట్టకూడదు. ఎందుకంటే అనుకోకుండా ఎప్పుడైనా గ్యాస్‌ లీకైతే ఇబ్బందులు ఎదుర్కొవాల్సి వస్తుంది. కాబట్టి, కిచెన్‌లోనే వేరేచోట ఇండక్షన్ స్టవ్​ని పెట్టి వంట చేసుకోవాలి.

ఎలా క్లీన్ చేస్తున్నారు?

నార్మల్​గా గ్యాస్‌ స్టవ్​ను సోప్‌, నీళ్లను ఉపయోగించి క్లీన్​ చేస్తుంటాం. కానీ, ఇండక్షన్‌ స్టవ్​ని ఇలా శుభ్రం చేస్తే పాడవుతుంది. ఈ క్రమంలో నీటిని ఉపయోగించకుండా మెత్తని వస్త్రంతో శుభ్రం చేసుకోవాలి.

సెట్టింగ్స్‌ సెట్‌ చేసుకోండి

ఇండక్షన్ స్టవ్​లు చాలా త్వరగా హీట్​ అవుతాయి. కాబట్టి మీరు వంట చేసే ముందే దానికి అనుగుణంగా సెట్టింగ్స్‌ను సెట్‌ చేసుకోండి. లేకపోతే వంట పాడైపోయే ప్రమాదం ఉంటుంది.

మరికొన్ని టిప్స్

• ఇండక్షన్ స్టవ్ వాడుతున్నప్పుడు సాధ్యమైనంత వరకు దానికి సరిపోయే వంట పాత్రలనే ఎంపిక చేసుకోవాలి.
• ఇండక్షన్ స్టవ్ టీవీలు, కంప్యూటర్లు, రేడియోలకు దూరంగా ఉంచాలి. ఎందుకంటే అయస్కాంత క్షేత్ర ప్రభావం వల్ల అవి పాడైపోయే అవకాశం ఉంటుంది.
• ఎట్టి పరిస్థితుల్లోనూ ఎక్స్‌టెన్షన్ ప్లగ్ బాక్సులకు ఇండక్షన్ స్టవ్​ ప్లగ్‌ని పెట్టకూడదు.
• అలాగే ఇండక్షన్ స్టవ్​కి ఉన్న రంధ్రాల్లో దుమ్ము, ధూళి చేరకుండా జాగ్రత్తగా చూసుకోవాలి.
• ఇండక్షన్‌ స్టవ్​కి ఏమైనా పగుళ్లు వచ్చినట్లు కనిపిస్తే దానిని వాడకూడదు.
• ఇంకా వంట చేసే సమయంలో స్టవ్​ దగ్గర్లో ఎలాంటి లోహ సామగ్రిని ఉంచకూడదని నిపుణులు చెబుతున్నారు.