விழுப்புரம்: 2021 - 2022ஆம் ஆண்டின் சட்டமன்ற அறிவிப்பு எண்.27 மற்றும் 28-ன் படி, இந்து சமய அறநிலையத்துறையின் ஆளுகையிலுள்ள கிராமப்புற திருக்கோயில்கள் திருப்பணி திட்டம் மற்றும் ஆதிதிராவிடர் மற்றும் பழங்குடியினர் வாழும் பகுதியிலுள்ள திருக்கோயில்கள் திருப்பணி திட்டம் ஆகியவற்றின் கீழ், திருக்கோயில் ஒன்றுக்கு ரூ.2 லட்சம் வீதம், முதலமைச்சர் மு.க.ஸ்டாலின் தலைமையில் நிதியுதவி வழங்கும் விழா இன்று (ஜன.5) மாலை நடைபெற உள்ளது.
இந்த நிகழ்ச்சியில் கலந்து கொண்டு நிதி பெறுவதற்காக விழுப்புரத்தை சுற்றியுள்ள சிறிய கோயில் நிர்வாகிகள், இன்று மாலை நடைபெற உள்ள முதலமைச்சர் நிகழ்ச்சியில் ரூ.2 லட்சம் பெற உள்ளனர். இதற்காக விழுப்புரம் மாவட்ட நிர்வாகம் சார்பில் இரண்டு பேருந்துகள் ஏற்பாடு செய்யப்பட்டு, அவை மாவட்ட ஆட்சியர் அலுவலகத்தில் இருந்து புறப்பட்டன.
இதனை வெளிநாடு வாழ் தமிழர் நலத்துறை அமைச்சர் செஞ்சி மஸ்தான் கொடியசைத்து தொடங்கி வைத்தார். இதனையடுத்து செய்தியாளர்களைச் சந்தித்த அமைச்சர் செஞ்சி மஸ்தான், "பெரியவர்களாக இருந்தாலும், சிறியவர்களாக இருந்தாலும், அனைவரையும் நாகரிகத்தோடு வரவேற்கின்ற பண்பினை அண்ணா, பெரியார், கருணாநிதி மற்றும் ஸ்டாலின் ஆகியோர் எங்களுக்கு கற்றுக் கொடுத்துள்ளனர். அவர்களை நாங்கள் பின்பற்றி வருகிறோம்.
எதிர்கட்சியில் இருப்பவர்கள் ஆளுங்கட்சியை குறை கூறுவது வழக்கமான ஒன்றுதான். நாகரிகமற்ற முறையில் பேசுவதுதான் அதிமுகவின் பண்பு. அவர்கள் அடிமைகளாகவே இருந்து வருகின்றனர். எல்லோருக்கும் எல்லாம் கிடைக்க வேண்டும் என்பதுதான் எங்களுடைய திராவிட மாடல் ஆட்சியின் நோக்கம். உதயநிதி பற்றி விமர்சனம் செய்து வருபவர்களுக்கு காலப்போக்கில் தக்க பதிலடி கொடுக்கப்படும்.
அவர் கருணாநிதியின் பேரப் பிள்ளையாக இருந்தாலும், தமிழ்நாட்டு மக்களுடைய செல்லப்பிள்ளை ஆவார். அண்ணாமலை விமர்சனங்களைக் கடந்து பயணிக்க வேண்டும். அவர் படித்தார் பணிக்கு சென்றார். மற்றபடி, அண்ணாமலைக்கு அடிப்படை கொள்கை, லட்சியம் எதுவும் கிடையாது. பாஜகவில் சிக்கிக்கொண்டு அவர் முழித்து வருகிறார். திராவிட மாடல் ஆட்சி யாரையும் அச்சுறுத்தாது. நாங்களும் யாரையும் அச்சுறுத்த மாட்டோம். மோடி வேண்டுமானால் பொங்கல் பரிசுடன் தேங்காய் வழங்கட்டும். நாங்கள் அதனை வரவேற்கிறோம்” என்றார்.
இதையும் படிங்க: பயிர்கடன் தொடர்பாக அமைச்சர் பெரியகருப்பன் முக்கிய அறிவிப்பு!
