நாடு முழுவதும் 72ஆவது குடியரசு தின விழா இன்று வழக்கமான உற்சாகத்துடன் கொண்டாடப்பட்டது. இதன் ஒரு பகுதியாக தூத்துக்குடி மாவட்டத்தில் மாவட்ட ஆட்சியர் செந்தில்ராஜ் தருவைகுளம் மைதானத்தில் தேசிய கொடியை ஏற்றி வைத்து மரியாதை செலுத்தினார். நிகழ்ச்சியில் மாவட்ட காவல் கண்காணிப்பாளர் ஜெயக்குமார் தலைமையில் காவல் துறை அணிவகுப்பு மரியாதை வழங்கப்பட்டது. அதனை மாவட்ட ஆட்சியர் செந்தில்ராஜ் ஏற்றுக்கொண்டார்.
தொடர்ந்து சுதந்திர போராட்ட தியாகிகளின் குடும்ப உறுப்பினர்களுக்கு பொன்னாடை போர்த்தி கௌரவிக்கப்பட்டது. குடியரசு தின விழாவையொட்டி பொதுமக்களுக்கு அரசு நலத்திட்டங்களும் வழங்கப்பட்டன. இதைப்போல தூத்துக்குடி வ.உ. சிதம்பரனார் பொறுப்பு கழக துறைமுகத்தில் நடைபெற்ற குடியரசு தின விழாவில் துறைமுக பொறுப்பு கழக தலைவர் ராமச்சந்திரன் கலந்துகொண்டு தேசிய கொடியை ஏற்றி வைத்தார்.
தொடர்ந்து அவருக்கு மத்திய தொழில் பாதுகாப்பு படையினர் அணிவகுப்பு மரியாதை வழங்கினர். இதையடுத்து நடைபெற்ற நிகழ்வில் வ.உ.சிதம்பரனார் துறைமுகத்தில் கரோனா ஊரடங்கு காலகட்டத்திலும் துறைமுகத்தின் வளர்ச்சிக்காக பணியாற்றிய துறைமுக ஊழியர்கள், கன்டெய்னர் போக்குவரத்து நிறுவனத்தினர், ஒப்பந்ததாரர்கள், ஏற்றுமதி இறக்குமதி முகவர்கள் உள்ளிட்டோருக்கு நினைவுப் பரிசும், பாராட்டுச் சான்றிதழும் வழங்கி கௌரவிக்கப்பட்டது.
நிகழ்ச்சியில் துறைமுக பொறுப்பு கழக தலைவர் ராமச்சந்திரன் பேசுகையில், “ கரோனா ஊரடங்கு காலகட்டத்தில் உலகளாவிய அளவில் சரக்குப் போக்குவரத்து மந்த நிலையை எட்டியதால் நமது நாட்டிலும் அதன் பிரதிபலிப்பு இருந்தது. தூத்துக்குடி பாபு சிதம்பரனார் துறைமுகத்தில் சரக்கு கையாளுகை கடந்த ஆண்டை காட்டிலும் 12.25 சதவீதம் குறைந்துள்ளது. துறைமுகத்தில் மூன்றாவது சரக்கு பெட்டக முனையத்தை ஒன்பதாவது கப்பல் தளத்தில் ரூ.435 கோடி திட்ட மதிப்பீட்டில் அமைப்பதற்கு மத்திய அரசு அனுமதி அளித்துள்ளது.
இதற்காக ஒன்பதாவது சரக்கு கப்பல் தளத்தினை ஆழப்படுத்தும் பணிகள் விரைவில் தொடங்கப்படும். 2024ஆம் ஆண்டிற்குள் சரக்கு தளம் 1 முதல் 4வரை ரூ.2144.12 கோடி திட்ட மதிப்பில் 840 மீட்டர் நீளமும் 15.50 மீட்டர் மிதவை ஆழம் கொண்ட தளமாகவும் மாற்றப்படும். இதனால் சர்வதேச சரக்கு பெட்டக பரிமாற்று முனையமாக வ.உ. சிதம்பரனார் துறைமுகம் உருமாறும். இதன் பயனாக துறைமுகத்திலிருந்து 1.76 மில்லியன் டி.யு.இ.க்கள் கையாள முடியும்.
வ.உ.சிதம்பரனார் துறைமுகம் புதுப்பிக்கப்பட்ட எரிசக்தியை தயாரித்தல் மற்றும் பயன்படுத்துவதற்கு முன்னுதாரணமாக திகழ்கிறது. ஆகையால் 5 மெகாவாட் திறனுடன் இயங்கக்கூடிய சூரிய மின்சக்தி ஆலையை ரூ 18.78 கோடி செலவில் அமைப்பதற்கான உத்தரவுகள் வழங்கப்பட்டுள்ளன. இந்த பணிகள் வருகிற ஆகஸ்ட் மாதத்தில் நிறைவடையும்.
மேலும் 140 கிலோ வாட் திறன் கொண்ட மேற்கூரை சூரிய மின்சக்தி ஆலையை ரூ. 54 லட்சம் செலவில் துறைமுகத்தில் பல்வேறு பகுதிகளில் நிறுவவும் திட்டமிடப்பட்டுள்ளது. 2030ஆம் ஆண்டு முதல் 30 சதவீதம் மின் சக்தியால் இயங்கக்கூடிய கார்கள் நம் நாட்டில் பயன்பாட்டிற்கு வர வேண்டும் என்ற அரசின் தொலைநோக்கு பார்வையின் அடிப்படையில் இந்திய பெரும் துறைமுகங்களில் முதல்முறையாக மின் சக்தியில் இயங்கக்கூடிய கார்களை வாங்க தூத்துக்குடி வ.உ. சிதம்பரனார் துறைமுகம் முன்வந்துள்ளது.
தூத்துக்குடி வ.உ. சிதம்பரனார் துறைமுகத்திற்கு எதிர்கால தேவைக்காக 3 எலக்ட்ரிக் கார்களை வாங்குவதற்கு கடந்த மாதம் உத்தரவு வழங்கப்பட்டுள்ளது. எலக்ட்ரானிக் கார்களை மின்னூட்டுவதற்காக விரைவில் மின்னேற்று நிலையங்களை நிறுவவும் நடவடிக்கை எடுக்கப்பட்டு வருகிறது” என்றார்.
