மக்களவைத் தேர்தல் நடைபெற இருப்பதையொட்டி தேர்தலில் பொதுமக்கள் அனைவரும் பங்கேற்று 100 விழுக்காடு வாக்களிப்பதை வலியுறுத்தும் விதமாக தூத்துக்குடியில் பல்வேறு கட்ட விழிப்புணர்வு நிகழ்ச்சிகள் நடத்தப்பட்டு வருகிறது. அதன் ஒரு பகுதியாக தூத்துக்குடி பசுமைப் பண்ணை நுகர்வோர் கூட்டுறவு சங்கத்தில் இருந்து விற்பனையாகும் பொருள்களின் மீது தேர்தல் விழிப்புணர்வு ஸ்டிக்கர் ஒட்டும் நிகழ்ச்சி இன்று நடைபெற்றது.
நிகழ்ச்சிக்கு மாவட்ட ஆட்சியர் சந்தீப் நந்தூரி தலைமை தாங்கினார். தொடர்ந்து அங்கு அமைக்கப்பட்டிருந்த மாதிரி வாக்குச்சாவடியில் வாக்குப் பதிவு குறித்து கூட்டுறவு நுகர்வோருக்கு விழிப்புணர்வையும் ஏற்படுத்தினார். இதையடுத்து செய்தியாளர்களிடம் பேசிய அவர், ”நேற்றைய தினம்வரை மக்களவைத் தேர்தலுக்காக 26 பேர் வேட்பு மனுக்கள் தாக்கல் செய்துள்ளனர். மாவட்டத்தில் தேர்தல் பார்வை கண்காணிப்பாளர் மற்றும் தேர்தல் அதிகாரிகள் தங்களது பணிகளை தொடர்ந்து செய்துவருகின்றனர். தேர்தல் பறக்கும் படை குழுக்கள் இரண்டு மடங்காக உயர்த்தப்பட்டுள்ளது.
நேற்றைய தினம் தூத்துக்குடி மாவட்ட தேர்தல் பார்வை கண்காணிப்பாளரான சீமா ஜெயின் தூத்துக்குடிக்கு வருகை தந்து தேர்தல் பணிகளை ஆய்வு செய்துவருகிறார். தூத்துக்குடி பசுமை பண்ணை நுகர்வோர் சங்கத்திலிருந்து 5 லட்சத்திற்கும் அதிகமான பொருட்கள் விற்பனையாவதால் அதன்மூலம் விழிப்புணர்வை ஏற்படுத்த முயற்சி எடுக்கப்பட்டுள்ளது.
வாக்காளர் பட்டியலில் பெயர் சேர்க்கும் நடவடிக்கைகள் தற்போது வரை தொடர்ந்து நடைபெற்று வருகிறது. இதுவரையில் 25 ஆயிரத்திற்கும் மேற்பட்டோர் புதிய வாக்காளர்களாக வாக்காளர் பட்டியலில் சேர்வதற்காக படிவம் வழங்கியுள்ளனர்.
மாவட்டத்தில் 1619 வாக்குச்சாவடி ஏற்படுத்தப்பட்டுள்ளன. தேவையின் அடிப்படையில் இந்த வாக்குச்சாவடிகள் அதிகரிக்கலாம். தேர்தல் விதிமுறை மீறல் தொடர்பாக 75 வழக்குகள் பதிவு செய்யப்பட்டுள்ளன. ரூ.35 லட்சம் பறிமுதல் செய்யப்பட்டுள்ளன” என்றார்.
