தஞ்சாவூர்: கும்பகோணம் மாதுளம்பேட்டை சீதளா மாரியம்மன் கோயில் தெருவைச் சேர்ந்த தங்கையன் என்பவரது மகள் செந்தாமரை (40), இவர் வெளிநாடுகளில் கார் ஓட்டுநராக பணியாற்றி அதில் வந்த வருமானத்தை, கும்பகோணத்தில் உள்ள அவரது உறவினர்கள் மற்றும் நண்பர்களுக்கு எந்தவித ஆவணமும் இல்லாமல் கொடுத்துள்ளார். பின்னர் இந்தியா திரும்பியதும் அழகு கலை நிபுணராக பணியாற்றி வந்துள்ளார். செந்தாமரை வெளிநாட்டில் இருக்கும் போது கொடுத்த பணத்தை உறவினர்கள் மற்றும் நண்பர்களிடம் திரும்பி கேட்டபோது, அவர்கள் அதனை வழங்காமல் இருந்துள்ளனர்.
பண மோசடி செய்தவர்கள் மீது புகார்: உறவினர்கள் மற்றும் நண்பர்கள் மீது செந்தாமரை கும்பகோணம் தாலுகா காவல் நிலையத்தில் புகார் அளித்தார். இருப்பினும் இந்த குற்றச்சாட்டுக்கு போதிய ஆதாரங்கள் இல்லாததால் காவல்துறையினர் நடவடிக்கை எடுக்கவில்லை. இதனால் மனமுடைந்த செந்தாமரை நீதிமன்றத்தில் முறையிட திட்டமிட்டுள்ளார்.
இந்நிலையில் நேற்று (ஜன.4) நீதிமன்றம் செல்ல முயன்ற செந்தாமரையை தடுத்ததாக பெண் உதவி ஆய்வாளர் சுமதி மற்றும் தலைமை காவலர் சரோஜினி ஆகியோர் உட்பட சில காவலர்களையும் திட்டி தாக்கியுள்ளார். இவர் செய்த ரகளையால் அப்பகுதியில் பரபரப்பு ஏற்பட்டது.
இது குறித்து தகவல் அறிந்து சம்பவ இடத்திற்கு கும்பகோணம் கிழக்கு காவல் ஆய்வாளர் அழகேசன் மற்றும் ஏராளமான பெண்கள் காவலர்கள் செந்தாமரையை சுற்றி வளைத்து விசாரணைக்காக, வலுக்கட்டாயமாக காவல்துறை வாகனத்தில் ஏற்றி, கும்பகோணம் அனைத்து மகளிர் காவல் நிலையத்திற்கு அழைத்து சென்றனர். அவரது இருசக்கர வாகனத்தையும், மினிசரக்கு வாகனத்தில் காவல் நிலையத்திற்கு ஏற்றிச் சென்றனர்.
இதற்கிடையே போலீசாரை பணி செய்ய விடாமல் தடுத்தது, போலீசார் குறித்து பொது இடத்தில் தரக்குறைவாக பேசியது, போலீசாரை தாக்கி, ரகளையில் ஈடுபட்டது உள்ளிட்ட 4 பிரிவுகளின் கீழ் போலீசார் செந்தாமரை மீது வழக்குப்பதிவு செய்து கைது செய்தனர். பின்னர் அவர் கும்பகோணம் குற்றவியல் நீதித்துறை நடுவர் நீதிமன்ற நீதிபதி பாரதிதாசன் முன்பு ஆஜர் செய்யப்பட்டார். இதனையடுத்து அவர் செந்தாமரையை வரும் 12ம் தேதி வரை நீதிமன்ற காவலில் வைக்க உத்தரவிட்டார். தொடர்ந்து செந்தாமரை பாதுகாப்பாக, திருவாரூரில் உள்ள மகளிர் கிளை சிறைச்சாலைக்கு கொண்டு சென்றனர்.
இதையும் படிங்க:பாம்பு கடித்து இறந்த சிறுவனின் குடும்பத்திற்கு ரூ.2 லட்சம் நிதியுதவி
