சிவகங்கை மாவட்டம் சாலைகிராமம் அருகே உள்ள சாத்தனூரில் இளையான்குடி தெற்கு ஒன்றிய பாஜக சார்பில் நம்ம ஊரு பொங்கல் விழா நடைபெற்றது. இதனை பாஜகவின் மூத்த தலைவர் ஹெச்.ராஜா தொடங்கி வைத்தார். அதன்பின் செய்தியாளர்களைச் சந்தித்த ஹெச்.ராஜா, “உலகெங்கிலும் பொங்கல் பண்டிகை இந்து பண்டிகையாக, இந்து தர்மப்படி கொண்டாடப்பட்டு வருகிறது. திராவிட இயக்கத்தைச் சேர்ந்த கருத்து திருடர்கள், தற்போது இந்துக்களின் பண்டிகைகளையும் திருட ஆரம்பித்து விட்டனர்.
ஒன்றே குலம் ஒருவனே தெய்வம் என்று திருமூலர் சொன்னார். ஆனால், திராவிட கட்சியினர், அண்ணாதுரை சொன்னதாக கூறுகின்றனர். திமுக ஆட்சி, அனைத்து துறைகளிலும் தோற்றுப்போன ஆட்சி. ஆட்சிக்கு வருவதற்கு முன்பே மகளிருக்கு உரிமைத் தொகையாக மாதந்தோறும் 1,000 ரூபாய் கொடுப்பதாக கூறினர். ஆனால் 2 ஆண்டுகளாகியும் இதுவரை வழங்கவில்லை.
அதேபோல் வீடுகளுக்கு மாதந்தோறும் மின் கணக்கீடு செய்யப்படும் என கூறினர். ஆனால் தற்போது மின்சாரக் கட்டணத் தொகையை கூட்டியுள்ளனர். மேலும் சொத்து வரியையும் கூட்டியுள்ளனர். தற்போது கரும்பு கொள்முதலிலும் மோசடி செய்துள்ளனர். இவர்கள் திருட்டு ஆட்சி நடத்துகின்றனர்.
வர இருக்கிற ஈரோடு கிழக்கு சட்டமன்ற தொகுதி இடைத்தேர்தலில், மக்கள் திமுகவிற்கு சரியான பாடம் புகட்டுவார்கள். திமுக மிகப்பெரிய தோல்வியை சந்திக்கும். திமுக அரசாங்கம் நடுங்கிப் போயுள்ளது. ஆளுநர் ரவியை தொடுவதும், பிரதமர் மோடியை தொடுவதும் ஒன்றுதான். இனிமேல் ஆளுநரைப் பற்றி பேசக் கூடாது. அவர் பேசவும் உரிமை கிடையாது.
ஒன்றரை சதவீதம் ஓட்டு வித்தியாசத்தில் வந்த திமுகவினர், ஆளுநரை மிரட்டி விட்டோம் என்று கூறுகின்றனர். காரைக்குடியில் நடந்த பட்டமளிப்பு விழாவில் வாய்களை பொத்திக்கொண்டு அமைதியாக இருந்த அமைச்சர்கள் பொன்முடி, பெரியகருப்பன் பேச வேண்டியதுதானே” என்றார்.
இதையும் படிங்க: தேசியக்கொடி கம்பத்தில் சாதிக்கொடி; நெல்லை ஆட்சியரிடம் புகார்!
