சேலத்தில் எம்ஜிஆர் 103ஆவது பிறந்தநாளை முன்னிட்டு அதிமுக சார்பில் நடைபெற்ற பொதுக்கூட்டத்தில் பெங்களூரு புகழேந்தி கலந்துகொண்டு பேசினார். பின்னர் செய்தியாளர்களுக்குப் பேட்டியளித்த அவர், ‘டிடிவி தினகரன் கடந்த இரண்டு மாத காலமாக காணாமல் போய்விட்டார். அவர் எங்கு இருக்கிறார் என்பதே யாருக்கும் தெரியவில்லை. டிடிவியின் அரசியல் முடிந்துபோன அரசியல். அதிமுகவையும், ஆட்சியையும் ஒன்றும் செய்ய முடியாது. திமுகவின் அரசால் இரண்டு வழக்குகள் போடப்பட்டன. ஒன்று லண்டன் வழக்கு. அதில் குற்றம்சாட்டப்பட்டவர் டிடிவி.
இன்னொன்று முன்னாள் முதலமைச்சர் மீதான சொத்துக்குவிப்பு வழக்கு. இதில், டிடிவி தினகரன் திமுகவிடம் மண்றாடி லண்டன் வழக்கை வாபஸ் பெறச்செய்தார். அதன்பின்னர் திமுகவும் டிடிவி தினகரனும் சேரந்துதான் சொத்துக்குவிப்பு வழக்கை நடத்தினர்.
அதுதான் இப்படி ஒரு கடுமையான தீர்ப்பு முன்னாள் முதலமைச்சர் ஜெயலலிதா மீது வருவதற்கு காரணமாக இருந்தது. டிடிவி தினகரன் பொதுமக்களிடமும் மீடியாக்கள் முன்பும் பேச பயப்படுகிறார். ஆர்.கே. நகர் தொகுதியில் சென்று மக்களைச் சந்திக்க முடியவில்லை.
17 சட்டப்பேரவை உறுப்பினர்களை நடுத்தெருவில் நிறுத்திவிட்டார். அவர் மட்டும் சட்டப்பேரவை உறுப்பினராக இருக்கிறார். எம்ஜிஆர், ஜெயலலிதா வளர்த்த கட்சியை எடப்பாடி பழனிசாமியும், துணை முதலமைச்சர் பன்னீர்செல்வமும் இணைந்து கட்டிக்காத்து வருகின்றனர்’ என்றார்.
இதையும் படிங்க: குமரியில் அய்யா வைகுண்டசாமியின் கலிவேட்டையாடும் நிகழ்ச்சி
