புதுக்கோட்டை மாவட்டம் வடமலாப்பூரில் கருப்பர் மற்றும் பிடாரியம்மன் கோயில் திருவிழாவை முன்னிட்டு ஜல்லிக்கட்டுப் போட்டி நடைபெற்றது. இந்தப் போட்டியை சுகாதாரத்துறை அமைச்சர் விஜயபாஸ்கர் தொடங்கி வைத்தார். முன்னதாக மாவட்ட ஆட்சித்தலைவர் உமா மகேஸ்வரி தலைமையில் உறுதிமொழி ஏற்றப்பிறகு ஜல்லிக்கட்டுப் போட்டி தொடர்ந்து நடைபெற்றது.
இந்த ஜல்லிக்கட்டில் திருச்சி, தஞ்சாவூர், மதுரை, திண்டுக்கல், சிவகங்கை உள்ளிட்ட பல்வேறு மாவட்டங்களில் இருந்து 800 காளைகள் பங்கேற்றன. அதே போன்று பல்வேறு மாவட்டங்களில் இருந்தும் 300 மாடுபிடி வீரர்கள் கலந்து கொண்டனர். வாடிவாசலில் சீறிப் பாய்ந்த காளைகளை அடக்கிய சிறந்த மாடுபிடி வீரர்களுக்கும் வீரர்களிடம் சிக்காமல் ஆட்டம் காட்டிய காளைகளுக்கும் பல்வேறு பரிசுகள் வழங்கப்பட்டன.
காளைகள் முட்டியதில் காயமடைந்த வீரர்களுக்கு உடனடியாக சிகிச்சை அளிக்க விழா கமிட்டி சார்பாக ஏற்பாடு செய்யப்பட்டிருந்தது. மேலும் இந்தப் போட்டியில் நூற்றுக்கணக்கான காவல்துறையினர் பாதுகாப்புப் பணியில் ஈடுபடுத்தப்பட்டிருந்தனர். முன்னதாக ஜல்லிக்கட்டு தொடங்குவது முன் சாரல் மழை பெய்ததால் மழையையும் பொருட்படுத்தாமல் பார்வையாளர்கள் ஜல்லிக்கட்டை நேரில் கண்டு ரசித்தனர்.
இதையும் படிங்க:
'பெருவுடையார் கோயில் குடமுழுக்கை தமிழ் முறைப்படி நடத்தவேண்டும்' - மு.க. ஸ்டாலின்
