தாயிடம் தகராறு செய்த குடிகாரத் தந்தை: ஆத்திரத்தில் கொன்ற மகன்

நாகப்பட்டினம்: தாயிடம் தினமும் தகராறு செய்து வந்த தந்தையை அரிவாளால் வெட்டி கொலை செய்த மகனை காவல்துறையினர் கைது செய்தனர்.

நாகப்பட்டினம் மாவட்டம், திருப்புகலூர் அருகே தண்ணீர் வற்றி புதர் மண்டிய குட்டகன்னி என்ற குளத்தில், பாதி எரிந்த நிலையில் ஒரு ஆண் சடலம் ஒன்று கிடந்துள்ளது. இதைப் பார்த்த அப்பகுதி மக்கள் திட்டச்சேரி காவல் நிலையத்திற்குத் தகவல் கொடுத்துள்ளனர்.

தகவலின் அடிப்படையில் நாகப்பட்டினம் துணை கண்காணிபாளர் முருகவேல், நாகூர் காவல் ஆய்வாளர் ராதாகிருஷ்ணன் உள்ளிட்டோர் சம்பவ இடத்தில் ஆய்வு மேற்கொண்டனர். விசாரணையில், அவர் திருப்புகலூர் மேல்பகுதி கிராமத்தைச் சேர்ந்த, தமிழ்வாணன் என்பது தெரியவந்தது.

பின்னர் அவரது குடும்பத்தினரிடம் நடத்திய விசாரணையில், தந்தையை மகனே வெட்டி கொலை செய்ததும், கொலைக்கான தடையங்களை மறைக்க காட்டில் வைத்து எரித்ததும் தெரியவந்துள்ளது. உயிரிழந்த தமிழ்வாணனுக்கு, ஜெயசுதா என்கிற மனைவியும், தமிழ்ச்செல்வன், சந்தியா, தவசீலன், தனுஷ் ஆகிய நான்கு பிள்ளைகள் உள்ளனர்.

கொலையான தமிழ்வாணன்.

தமிழ்வாணன் தினமும் இரவு குடித்துவிட்டு மனைவி ஜெயசுதாவிடம் தகராறு செய்வதை வழக்கமாக வைத்துள்ளார். இந்நிலையில் வெளியூரில் வேலை பார்த்து வந்த மூத்த மகன் தமிழ்ச்செல்வன், கரோனா காரணமாக கடந்த சில மாதங்களாக வீட்டில் தங்கி இருக்கிறார்.இந்த நிலையில் தமிழ்வாணன் தினமும் குடித்து விட்டு தாய் ஜெயசுதாவிடம் தகராறு செய்ததைத் தமிழ்ச்செல்வன் கண்டித்துள்ளார்.

ஆனால் அதனை பொருட்படுத்தாமல் தமிழ்வாணன் தினமும் இரவு நேரங்களில் குடித்துவிட்டு வீட்டிற்கு வந்து மனைவியிடம் தகராறு செய்வதை வாடிக்கையாகக் கொண்டுள்ளார். இந்நிலையில், ஜூன் 6 ஆம் தேதி இரவு 8.30 மணியளவில் தமிழ்வாணன் வழக்கம் போல் குடித்துவிட்டு அரிவாளை எடுத்து ஜெயசுதாவை வெட்ட முற்பட்டபோது, தமிழ்செல்வன் அரிவாளை, தமிழ்வாணனிடமிருந்து பிடுங்கி தந்தையை வெட்டியுள்ளார். ரத்த வெள்ளத்தில் சரிந்து விழுந்த தமிழ்வாணன் சம்பவ இடத்திலையே உயிரிழந்தார்.

இதனால் அதிர்ச்சி அடைந்த தமிழ்செல்வன், தாய் ஜெயசுதா ஆகிய இருவரும், தமிழ்வாணனின் உடலை ஒரு பாயில் சுருட்டி அரசூர் ரோட்டில் உள்ள தண்ணீர் இல்லாத குட்டகன்னி குளத்தில் வைத்து பெட்ரோல் ஊற்றி எரித்துவிட்டு, பாதி எரிந்த தமிழ்வாணனின் உடலை குளத்தில் உள்ள காட்டாமணி காட்டில் மறைத்து வைத்து விட்டு சகஜமாக இருந்துள்ளனர்.

இதனையடுத்து சடலத்தை மீட்ட காவல்துறையினர் உடற்கூறாய்வுக்காக நாகை அரசு தலைமை மருத்துவமனைக்கு அனுப்பி வைத்துள்ளனர். பின்னர் ஜெயசுதா, தமிழ்செல்வன், தவசீலன் ஆகிய 3 நபர்களையும், திட்டச்சேரி காவல் நிலையத்தில் வைத்து காவலர்கள் தொடர்ந்து விசாரணை நடத்தி வருகின்றனர்.