நாகப்பட்டினம் மற்றும் காரைக்கால் மாவட்டங்களில் நிலம், ஆழமற்ற கடல் பகுதிகளில் 158 ஹைட்ரோகார்பன் கிணறுகள் அமைக்க வேதாந்தா மற்றும் ஓஎன்ஜிசி நிறுவனத்திற்கு மத்திய சுற்றுச்சூழல் துறை அமைச்சகம் அனுமதி வழங்கியுள்ளது. இந்த திட்டத்திற்கு அந்த பகுதியில் உள்ள விவசாயிகள் கடும் எதிர்ப்பு தெரிவித்து வருகின்றனர்.
இந்நிலையில் ஹைட்ரோ கார்பன் திட்டத்திற்கு எதிராக விவசாய சங்கத்தினர் போராட்டம் நடத்துவது குறித்த ஆலோசனை கூட்டம், நாகை மாவட்டம், காமேஷ்வரம் கிராமத்தில் இன்று நடைபெற்றது. இதில் சுற்று வட்டார பகுதியில் இருந்து ஏராளமான விவசாயிகள் கலந்து கொண்டனர். இதில் விவசாய நிலங்களையும் கடல் பகுதிகளையும் பாழாக்க கூடிய ஹைட்ரோ கார்பன் திட்டத்திற்கு எதிர்ப்பு தெரிவித்து கூட்டத்தில் தீர்மானமும் நிறைவேற்றப்பட்டது.
மேலும், காவிரி கடைமடை பகுதியில் ஹைட்ரோ கார்பன் எடுக்க முற்பட்டால், அனைத்து கட்சியினர் மற்றும் மக்களை திரட்டி வலுவான தொடர் போராட்டங்களை நடத்துவது என்றும் கூட்டத்தில் முடிவு செய்யப்பட்டுள்ளது.
