தஞ்சை பெரிய கோயிலின் குடமுழுக்கு நிகழ்ச்சி தமிழில் மட்டுமே நடத்தப்பட வேண்டும் என்று பல்வேறு மனுக்கள் சென்னை உயர் நீதிமன்ற மதுரைக்கிளையில் தாக்கல்செய்யப்பட்டு வழக்குத் தொடரப்பட்டது.
அந்த வழக்கின் விசாரணையில் இன்று நீதிபதிகள், தமிழ்நாடு அரசு தாக்கல்செய்திருந்த பிரமாண பத்திரத்தில் உறுதியளித்ததைப் போல் தமிழ், சமஸ்கிருதம் இருமொழிகளிலும் குடமுழுக்கு நிகழ்ச்சி நடைபெறும் எனத் தீர்ப்பளித்தனர். இந்தத் தீர்ப்பு தமிழ் ஆர்வலர்கள் மத்தியில் மிகுந்த வரவேற்பைப் பெற்றுள்ளது.
அதன்படி இந்தத் தீர்ப்பு குறித்து வழக்கு தொடுத்திருந்த வழக்கறிஞர்கள் திருமுருகன், ரூபஸ் ஆகியோர் நமது ஈடிவி பாரத் ஊடகத்திற்கு வழங்கிய நேர்காணலில், "ஏறக்குறைய ஆயிரம் ஆண்டுகளுக்கு பிறகு, குறிப்பாக ராஜராஜ சோழனுக்குப் பிறகு மீண்டும் தமிழ் மொழி தஞ்சை பெரிய கோயிலில் வழிபாட்டு மொழியாக நுழைவது தமிழ் மக்களுக்கு கிடைத்த முதல் வெற்றி.
தமிழ்நாடு அரசு தமிழ், சமஸ்கிருதம் இரண்டு மொழிகளிலும் குடமுழுக்கு நிகழ்ச்சி நடைபெறும் என உறுதியளித்து தாக்கல்செய்த பிரமாண பத்திரத்தின் அடிப்படையில் இந்தத் தீர்ப்பு வழங்கப்பட்டுள்ளது. தமிழ் மொழியில் மட்டுமே குடமுழுக்கு நிகழ்ச்சி நடைபெற வேண்டுமென தொடரப்பட்ட வழக்குகளில், இந்தத் தீர்ப்பு சற்று பின்னடைவு என்றாலும், தமிழ் மொழி கருவறைக்குள் நுழைந்திருப்பது வரவேற்கத்தக்க மாற்றம். இது நாளடைவில் தமிழ்நாடு முழுவதும் உள்ள கோயில்களில் எதிரொலிக்கும்" என்றனர்.
மேலும் இது குறித்து பேசிய தமிழ்த் தேசியப் பேரியக்கத்தின் மதுரை மாவட்ட செயலாளர் ராசு, "தமிழ் மொழி படிப்படியாக ஆலயத்திற்குள் நுழைந்துள்ளது என்பதை வெற்றியாகக் கருதினாலும், அடுத்தடுத்த சட்டப் போராட்டங்களினால் தமிழ்நாட்டின் ஆலயங்கள் அனைத்திலும் தமிழ் மொழி மட்டுமே வழிபாட்டு மொழியாக மாறும் என்ற நம்பிக்கையுள்ளது" என்றார்.
தஞ்சை பெரிய கோயிலில் யாகசாலை, நந்தி மண்டபம், கருவறை, கோபுரம் உள்ளிட்ட ஐந்து இடங்களில் குடமுழுக்கு நடைபெறும் என்பது குறிப்பிடத்தக்கது.
இதையும் படிங்க: நாகராஜா கோயில் திருவிழா கொடியேற்றத்துடன் கோலாகலமாகத் தொடக்கம்
