மதுரை: மதுரை, விருதுநகர், சிவகங்கை, தேனி, திண்டுக்கல், ராமநாதபுரம் உள்ளிட்ட தென் மாவட்டங்களைச் சேர்ந்த மக்கள் நாள்தோறும் பல்வேறு நோய்களுக்காக மதுரை அரசு ராஜாஜி மருத்துவமனையில் தங்கி சிகிச்சைப் பெற்று வருகின்றனர். இந்நிலையில் மதுரை அரசு ராஜாஜி மருத்துவமனை வளாகத்தில் அமைந்துள்ள குழந்தைகள் நல அறுவை சிகிச்சைப் பிரிவில் கடந்த 2018ஆம் ஆண்டு முதல் 2021 அக்டோபர் 31 வரையிலான 46 மாதங்களில் 4 ஆயிரத்து 432 எண்ணிக்கையிலான அறுவை சிகிச்சைகள் நடைபெற்றுள்ளன. இதில் சிகிச்சைப் பலனளிக்காமல் 261 குழந்தைகள் உயிரிழந்து விட்டன.
இதே காலகட்டத்தில் சென்னை எழும்பூர் குழந்தைகள் நல அரசு மருத்துவமனையில் பத்து மடங்கு அதிகமாக 45 ஆயிரத்து 401 எண்ணிக்கையில் சிறு மற்றும் பெரிய அளவிலான அறுவை சிகிச்சைகள் மேற்கொள்ளப்பட்டன. இந்த எண்ணிக்கை மதுரையைவிட 40 ஆயிரத்து 969 அதிகமாகும். ஆனால், குழந்தைகள் இறப்பு எண்ணிக்கையை ஒப்பிடுகையில் மதுரையைவிட சென்னையில் 137 இறப்புகள் என குறைவாகப் பதிவாகியுள்ளன. இது சமூக ஆர்வலர்களிடமும், குழந்தைகள் செயற்பாட்டாளர்களிடமும் பெரும் அதிர்ச்சியை ஏற்படுத்தியுள்ளது.
இதுகுறித்து அரசு மருத்துவமனைகள் குறித்து பல்வேறு ஆய்வுகளை மேற்கொள்வதுடன், தகவல் அறியும் ஆர்வலராகத் திகழும் சமூக ஆர்வலர் வெரோனிக்கா மேரி கூறுகையில், “மதுரை அரசு ராஜாஜி மருத்துவமனை குழந்தைகள் நல அறுவை சிகிச்சைப் பிரிவில் 86 வகையான உயிர்காக்கும் அறுவை சிகிச்சைகள் மட்டுமே மேற்கொள்ளப்படுகின்றன. ஆனால், எழும்பூர் குழந்தைகள் நல மருத்துவமனையில் மொத்தம் 227 உயிர்காக்கும் அறுவை சிகிச்சைகள் மேற்கொள்ளப்படுகின்றன.
மதுரையைக் காட்டிலும் 141 அறுவை சிகிச்சைகள் கூடுதலாக மேற்கொள்ளப்படுகின்றன. மதுரையை விட எழும்பூர் குழந்தைகள் நல அறுவை சிகிச்சைப் பிரிவில் நான்கு மடங்கிற்கும் அதிகமான எண்ணிக்கையில் அதி நவீன அறுவை சிகிச்சை மருத்துவ உபகரணங்கள் மற்றும் கருவிகள் பயன்பாட்டில் உள்ளன. இதே காலகட்டத்தில் மதுரை அரசு ராஜாஜி மருத்துவமனை குழந்தைகள் நலப்பிரிவில் அரசு மருத்துவக் காப்பீட்டுத் திட்டத்தின் வாயிலாக 3 கோடியே 68 லட்சத்து 79 ஆயிரத்து 274 ரூபாய் நிதி பயன்படுத்தப்பட்டுள்ளது. ஆனால், சென்னையில் 11 கோடியே 85 லட்சத்து 96 ஆயிரத்து 650 ரூபாய் பயன்படுத்தப்பட்டுள்ளது” என்றார்.
தொடர்ந்து அவர் கூறுகையில், “மதுரை அரசு ராஜாஜி மருத்துவமனை குழந்தைகள் நலப்பிரிவில், ஒரு பேராசிரியர், ஒரு இணை பேராசிரியர், நான்கு துணை பேராசிரியர்கள் என மொத்தமே ஆறு மருத்துவர்கள் மட்டுமே பணி புரிகின்றனர். ஆனால், எழும்பூர் குழந்தைகள் நல மருத்துவமனையில், 16 மருத்துவர்கள் 24 மணி நேரமும் சுழற்சி முறையில் பணியாற்றுகின்றனர். இரவு, பகல் என எந்நேரமும் செயல்பட்டு வருகின்றனர். 12க்கும் மேற்பட்ட மயக்கவியல் மருத்துவர்களும் உள்ளனர்.
