வேளாண் பட்ஜெட்: பனையிலிருந்து மது தயாரிக்க அனுமதிக்க வேண்டும் - வேளாண் உணவுத் தொழில் வர்த்தக சங்கம்

பனை மரத்தில் உற்பத்தியாகும் பனைத்தேனிலிருந்து ஏற்றுமதி தரம் வாய்ந்த ஒயின் உள்ளிட்ட விலை உயர்ந்த மதுபானங்கள் தயாரிக்க வேளாண் பட்ஜெட்டில் அனுமதிக்க வேண்டும் என வேளாண் உணவுத் தொழில் வர்த்தக சங்கத்தின் தலைவர் ரத்தினவேல் கோரிக்கை விடுத்துள்ளார்.

மதுரை: தமிழ்நாடு அரசு 2ஆவது ஆண்டாக கொண்டு வரவுள்ள வேளாண் பட்ஜெட்டில், மேலும் பல்வேறு சிறப்பு அனுமதிகளைத் தரக் கோரி, வேளாண் உணவுத் தொழில் வர்த்தக சங்கத்தின் தலைவரும், தமிழ்நாடு தொழில் வர்த்தக சங்கத்தின் முதுநிலை தலைவருமான ரத்தினவேல் ஈடிவி பாரத் ஊடகத்திற்கு சிறப்பு நேர்காணல் வழங்கினார்.

மதிப்புக் கூட்டப்பட்ட பொருள்

அப்போது பேசிய அவர், "நமது மாநில மரமான பனையின் எண்ணிக்கை தமிழ்நாட்டில் 7 கோடியாக இருந்தது. தற்போது வெறும் 2.5 கோடி மரங்களே பலன் தரக்கூடியனவாக உள்ளன. இந்நிலையில் பனை மரத்தை அரசின் அனுமதியின்றி வெட்டக்கூடாது என தமிழ்நாடு அரசு உத்தரவிட்டுள்ளதை நாங்கள் வரவேற்கிறோம். அதேபோன்று பனைமரத்திலிருந்து கிடைக்கும் பதநீர், நுங்கு ஆகியவற்றின் வரிசையில் பனைத்தேனிலிருந்து பல்வேறு மதிப்புக் கூட்டப்பட்ட பொருள்களை நாம் தயாரிக்க முடியும். அதுகுறித்த ஆய்வுகளை பனை வாரியம் தீவிரமாக மேற்கொள்ள வேண்டும்.

பதநீர் இறக்கும் தொழில்நுட்பம்

பனைமரத்திலிருந்து பதநீர் எடுக்கும் பண்டைய முறையில் பல்வேறு சிக்கல்கள் உள்ளன. அதனைத் தவிர்க்கும் வண்ணம் வெப்பநிலைக் கட்டுப்பாடு உடைய காற்றில்லாப் பைகளில் சுகாதாரமான முறையில் பதநீர் இறக்கும் தொழில்நுட்பத்தை ஊக்குவிக்க வேண்டும். பனை மரத்தில் உற்பத்தியாகும் பனைத்தேனிலிருந்து விலை உயர்ந்த, ஏற்றுமதி தரம் வாய்ந்த ஒயின் உள்ளிட்ட பல்வகையான விலை உயர்ந்த மதுபானங்கள் தயாரிக்க தமிழ்நாடு அரசு வெளியிட உள்ள வேளாண் பட்ஜெட்டில் அனுமதி அளிக்க வேண்டும்.

பனைமரம் தோட்டக் கலைத்துறை அல்லது வேளாண்துறை என எதில் உள்ளது என்பது தெளிவுபடுத்தப்பட வேண்டும். பனை சார்ந்த தொழிலை மீட்டெடுப்பதன் மூலம் மிகச் சிறந்த பொருளாதாரத்தை முன்னெடுக்க முடியும். கிராமங்களிலும் தொழில் மற்றும் வேலை வாய்ப்புகளை உருவாக்க முடியும்.

சிறுதானியங்கள் குறித்த பார்வை