'ஆம்பன் புயலால் தமிழ்நாட்டிற்கு எந்தப் பாதிப்பும் இல்லை'

மதுரை: ஆம்பன் புயலால் தமிழ்நாட்டிற்கு எந்தவிதமான பாதிப்பும் இல்லை என வருவாய் மற்றும் பேரிடர் மேலாண்மைத் துறை அமைச்சர் ஆர்.பி. உதயகுமார் தெரிவித்துள்ளார்.

தமிழ்நாடு வருவாய் மற்றும் பேரிடர் மேலாண்மைத் துறை அமைச்சர் ஆர்.பி. உதயகுமார் மதுரையில் இன்று செய்தியாளர்களைச் சந்தித்தார்.

அப்போது பேசிய அவர், ”கரோனா தடுப்பு நடவடிக்கையில் தமிழ்நாடு இந்தியாவிற்கே முன்மாதிரியாகத் திகழ்கிறது. இறப்பு விகிதத்தைக் குறைப்பதற்காகத் தமிழ்நாடு சுகாதாரத் துறை முயற்சி மேற்கொண்டுள்ளது.

குடிபெயர் தொழிலாளர்களைப் பாதுகாப்பாக அனுப்புவதற்கு மாவட்ட நிர்வாகம் தொடர்ந்து முயற்சி மேற்கொண்டுவருகிறது. பிற மாநிலங்களில் உள்ள தமிழ்நாட்டைச் சேர்ந்த தொழிலாளர்களை அழைத்துவருவதற்கான ஏற்பாடுகளைத் தமிழ்நாடு அரசு மேற்கொண்டுள்ளது.

வங்கக்கடலில் உருவாகியுள்ள ஆம்பன் புயலால் தமிழ்நாட்டிற்கு எந்தவித பாதிப்பும் இல்லை. 155 கிலோமீட்டரிலிருந்து 175 கிலோமீட்டர் வரை அதிகபட்சமாக 220 கிலோமீட்டர் வரை காற்று வீசக்கூடும்.

மத்திய அரசு தமிழ்நாட்டிற்கு 510 கோடி ரூபாய் பேரிடர் நிதியாக வழங்கியுள்ளது. மேலும் ஆயிரம் கோடி ரூபாய் வழங்க தமிழ்நாடு முதலமைச்சர் பழனிசாமி கோரிக்கைவிடுத்துள்ளார்” என்றார்.

இதையும் படிங்க:கரையைக் கடக்கும் ஆம்பன் புயல்: துரித தகவல்கள் உடனுக்குடன்...