தேர்தல் புறக்கணிப்பு போராட்டத்தில் ஈடுபட்ட பொதுமக்கள் - திமுக எம்எல்ஏ பேச்சுவார்த்தை

குடிநீர் வடிகால் வசதி, சாலை வசதி உள்ளிட்ட அடிப்படை வசதிகளை செய்து தராததை கண்டித்து கறுப்புக் கொடியை ஏந்தி தேர்தல் புறக்கணிப்பு போராட்டத்தில் ஈடுபட்ட பொதுமக்களிடம், கிருஷ்ணராயபுரம் திமுக எம்எல்ஏ பேச்சுவார்த்தை நடத்தினார்.

கரூர்: தாந்தோணி ஊராட்சி ஒன்றியத்தில் உள்ள எட்டு ஊராட்சிகளில், வார்டு உறுப்பினர்கள் தேர்தல் பரப்புரை நடத்தி வருகின்றனர். அடுத்த மாதம் அக்டோபர் ஒன்பதாம் தேதி வாக்குப்பதிவு நடைபெறுகிறது. அக்டோபர் 12ஆம் தேதி வாக்கு எண்ணிக்கை நடைபெற்று தேர்தல் முடிவுகள் அறிவிக்கப்பட உள்ளன.

இந்நிலையில் நேற்று (செப்.30) மேலப்பாளையம் ஊராட்சியை சேர்ந்த பொதுமக்கள் தேர்தல் புறக்கணிப்பு மேற்கொள்வதற்காக கறுப்புக்கொடி ஏந்தி, காலை முதல் போராட்டத்தில் ஈடுபட்டு வந்தனர்.

பேச்சு வார்த்தை

இது குறித்து தகவலறிந்து சம்பவ இடத்திற்கு சென்ற, திமுக கிருஷ்ணராயபுரம் சட்டப்பேரவை உறுப்பினர் சிவகாமசுந்தரி, தேர்தல் புறக்கணிப்பில் ஈடுபட்ட பொதுமக்களிடம் பேச்சுவார்த்தை நடத்தினார். பேச்சுவார்த்தையின் இறுதியில் உடனடியாக பணிகள் தொடங்குவதற்கு அலுவலர்களுக்கு உத்தரவிட்டார்.

பொதுமக்களின் கோரிக்கைகளான குடிநீர் நீர்த்தேக்கத் தொட்டி, ஆறு மாதத்துக்குள் அமைத்து கொடுக்கப்படும் எனவும் குடிநீர் மற்றும் கழிவுநீர் வடிகால் வசதி உடனடியாக அமைத்து தர நடவடிக்கை எடுக்கப்படும் என கிருஷ்ணராயபுரம் சட்டப்பேரவை உறுப்பினர் சிவகாமசுந்தரி உறுதியளித்தார்.

இதனால் போராட்டத்தை விலக்கிக் கொண்ட பொதுமக்கள், அப்பகுதி முழுவதும் ஏற்றப்பட்ட கறுப்புக் கொடிகளை அவர்களே அகற்றினர். தொடர்ந்து ஜேசிபி இயந்திரம் மூலம் குடிநீர் குழாய் அமைக்கும் பணிகள் தொடங்கி நடைபெற்று வருகின்றன.

போராட்டத்தால் முன்வந்த நலத்திட்டம்

இது குறித்து அப்பகுதியை சேர்ந்த ஸ்டாலின் பொதுமக்கள் சார்பில் நமது ஈடிவி பாரத் செய்தியாளரிடம் கூறுகையில், “கடந்த 10 ஆண்டுகளாக கரூர் மாவட்ட நிர்வாகத்திடமும், மேலப்பாளையம் ஊராட்சி நிர்வாகத்திடம் முறையிட்டும் அரசின் நலத்திட்ட உதவிகள் கிடைக்காமல் புறக்கணிக்கப்பட்டன.

ஆனால் திடீரென அறிவிக்கப்பட்ட தேர்தல் புறக்கணிப்பு போராட்டத்தின் விளைவாக கிருஷ்ணராயபுரம் சட்டப்பேரவை உறுப்பினர் மற்றும் கரூர் வட்டார வளர்ச்சி அலுவலர் மேலப்பாளையம் ஊராட்சி மன்ற தலைவர் ஆகியோர் நடத்திய பேச்சுவார்த்தையில் உடன்பாடு எட்டப்பட்டது” என்றார்.

கரூர் மாவட்ட ஊராட்சி குழு எட்டாவது வார்டு கவுன்சிலர் பொறுப்பில் இருந்த அதிமுக கவுன்சிலர் தானேஸ் என்கிற முத்துக்குமார், கிருஷ்ணராயபுரம் சட்டப்பேரவை வேட்பாளராக போட்டியிட்டதை தொடர்ந்து, தனது பதவியை ராஜினாமா செய்திருந்தார்.

தற்போது மீண்டும் எட்டாவது வார்டு கவுன்சிலர் பதவிக்கு அதிமுக சார்பில் வேட்பாளராக நிறுத்தப்பட்டுள்ள நிலையில், தேர்தல் புறக்கணிப்பு செய்து போராட்டத்தில் குதித்த சம்பவம் அதிமுக திமுக வேட்பாளருக்கு கடும் பின்னடைவை ஏற்படுத்தும் என்றும் கூறப்படுகிறது.