செங்கல்பட்டு மாவட்டம் மதுராந்தகம் பகுதியை அடுத்த அகரம் கிராமத்தில் மறைந்த முன்னாள் முதலமைச்சர் ஜெயலலிதாவின் 72ஆவது பிறந்தநாள் விழாவை முன்னிட்டு மாபெரும் கிரிக்கெட் போட்டி நடைபெற்று வருகிறது. காஞ்சி மத்திய மாவட்ட மருத்துவ அணி துணை செயலாளர் பிரவீன் குமார் தலைமையில், டிசம்பர் 29ஆம் தேதி முதல் பிப்ரவரி 23ஆம் தேதி வரை நடக்கும் இப்போட்டியில் கலந்துகொள்ள 70க்கும் மேற்பட்ட அணிகள் பல கிராமங்களிலிருந்து வந்தன.
இப்போட்டியில் சூனாம்பேடு பகுதியைச் சேர்ந்த சுனில் என்பவர் விளையாடிக் கொண்டிருந்தபோது, பந்து அவரின் மார்பு பகுதியில் பட்டது. இதனால் சுனில் நிலைதடுமாறி விளையாட்டு மைதானத்தில் சாய்ந்தார். இதையடுத்து அவருக்கு மதுராந்தகம் மருத்துவமனையில் சிகிச்சை அளிக்கப்பட்டது. பிறகு மேல் சிகிச்சைக்காக செங்கல்பட்டு மருத்துவமனைக்கு கொண்டு செல்லும் வழியில் சுனில்உயிரிழந்தார்.
இந்த உயிரிழப்புக்கு காரணம் முறையான பயிற்சியாளர் இல்லாததும், விளையாடுவதற்கான சரியான மைதானம் இல்லாததுதான் என முதற்கட்ட விசாரணையில் காவல் துறையினர் தெரிவித்துள்ளனர்.
இதையும் படிங்க: முதலமைச்சரின் அறிவிப்புக்கு அரசியல் தலைவர்கள் வாழ்த்து
