செம்பரம்பாக்கம் ஏரிக்கரையோர மக்களுக்கு வெள்ள அபாய எச்சரிக்கை: காஞ்சிபுரம் மாவட்ட ஆட்சியர்

செம்பரம்பாக்கம் ஏரியிலிருந்து ஆயிரம் கன அடி நீர் வெளியேற்றப்பட்டு வருவதால், பள்ளி, கல்லூரி மாணவர்கள் பாதுகாப்பான இடங்களுக்குச் செல்லுமாறும் பள்ளிச் சான்றிதழ் உள்ளிட்ட தங்களது உடைமைகள் அனைத்தையும் பத்திரப்படுத்துமாறும் காஞ்சிபுரம் மாவட்ட ஆட்சியர் டாக்டர் எம்.ஆர்த்தி வேண்டுகோள் விடுத்துள்ளார்.

காஞ்சிபுரம்: தமிழ்நாட்டில் தற்போது வடகிழக்குப் பருவ மழை தீவிரமடைந்துள்ளது. தொடர்ந்து பெய்து வரும் கன மழையின் காரணமாக அனைத்து நீர் நிலைகளும் வேகமாக நிரம்பி வருகின்றன.

சென்னைக்கு ரெட் அலெர்ட்

கன மழையானது தீவிரமடையும் என்பதால் சென்னைக்கு 'ரெட் அலெர்ட்' விடப்பட்டுள்ளது. மேலும், சென்னை, காஞ்சிபுரம், செங்கல்பட்டு, திருவள்ளூர் ஆகிய நான்கு மாவட்டங்களுக்கு நாளை(நவ.08) மற்றும் நாளை மறுதினம்(நவ.09) பள்ளி, கல்லூரிகளுக்கு விடுமுறை அளிக்கப்பட்டுள்ளது.

இந்நிலையில் சென்னைக்கு நீர் ஆதாரமாக விளங்கக் கூடிய, பொதுப்பணித்துறையினர் கட்டுப்பாட்டில் உள்ள காஞ்சிபுரம் மாவட்டம் ஸ்ரீபெரும்புதூர் அருகே உள்ள செம்பரம்பாக்கம் ஏரியின் முழுக் கொள்ளவான 23 அடியில் தற்போது ஏரியின் நீர்மட்டம் 21.45 அடியாக உள்ளது.

தற்பொழுது, ஏரிக்கு நீர் வரத்து தற்போது 1500 கன அடியாக உள்ள நிலையில் இன்று (நவ.07) இரவுக்குள் செம்பரம்பாக்கம் ஏரி முழுவதும் நிரம்பும் வாய்ப்பு உள்ளதால், இன்று பிற்பகல் 1.30 மணியளவில் செம்பரம்பாக்கம் ஏரியில் உள்ள ஐந்து மதகுகளில் இரண்டாவது மதகு திறக்கப்பட்டு, அதன் வழியாக ஏரியிலிருந்து விநாடிக்கு 500 கன அடி நீர் திறந்துவிடப்பட்டது.

ஏரியிலிருந்து நீர் திறந்து விடப்பட்டதை அடுத்து தமிழ்நாடு ஊரகத்தொழில் துறை அமைச்சர் தா.மோ.அன்பரசன், மாவட்ட ஆட்சியர் டாக்டர் எம். ஆர்த்தி, பொதுப் பணித் துறை உயர் அலுவலர்கள் ஏரியினை பார்வையிட்டு ஆய்வு மேற்கொண்டனர்.

வெள்ள அபாய எச்சரிக்கை

தற்போது இரண்டாம் கட்டமாக கூடுதலாக மேலும் 500 கன அடி நீர் திறக்கப்பட்டு மொத்தம் ஆயிரம் கன அடி நீரானது தற்போது வெளியேறி வருகிறது.

செம்பரம்பாக்கம் ஏரிக்கு நீர் வரத்து அதிகரிக்கும்போது ஏரியிலிருந்து வெளியேற்றப்படும் நீர் கூடுதலாக படிப்படியாக உயர்த்தி வெளியேற்றப்படும் எனவும் பொதுப்பணித்துறையினர் தகவல் தெரிவிக்கின்றனர்.

இதனையடுத்து, செம்பரபாக்கம் ஏரியைச் சுற்றியுள்ள நத்தம், குன்றத்தூர், நந்தம்பாக்கம், பூந்தமண்டலம், வழுதம்பேடு, பழந்தமண்டலம், எருமையோர், சிறு களத்தூர், திருமுடிவாக்கம், திருநீர்மலை மற்றும் அடையாறு ஆற்றங்கரையோரப் பகுதி மக்களுக்கும் வெள்ள அபாய எச்சரிக்கை விடுக்கப்பட்டுள்ளது.

மேலும் பள்ளி, கல்லூரி மாணவர்கள் பாதுகாப்பான இடங்களுக்குச் செல்லுமாறும், தங்களது பள்ளிச் சான்றிதழ் உள்ளிட்ட தங்களது உடைமைகள் அனைத்தையும் பத்திரப்படுத்திக் கொள்ளுமாறும், தாழ்வானப் பகுதியில் வாழும் மக்கள் பாதுகாப்பான இடங்களுக்குச் செல்லுமாறும் காஞ்சிபுரம் மாவட்ட ஆட்சியர் டாக்டர் எம்.ஆர்த்தி வேண்டுகோள் விடுத்துள்ளார்.

இதையும் படிங்க: சென்னை உட்பட 4 மாவட்டங்களுக்கு அடுத்த 2 நாட்களுக்கு பள்ளிகள் விடுமுறை – முதலமைச்சர்