ஈரோடு மாவட்டம் மாணிக்கம்பாளையத்தைச் சேர்ந்தவர் விசைத்தறி உரிமையாளர் கனகராஜ். இவர் அப்பகுதியில் உள்ள கிணற்றில் குதித்து நேற்றிரவு தற்கொலை செய்து கொண்டார்.
காவல்துறையினர் நடத்திய விசாரணையில், நிலையில்லாத நூல் விலையால் விசைத்தறி தொழில் பெரிதும் பாதிக்கப்பட்டுள்ளது. மேலும் பல லட்சம் மீட்டர் துணிகள் தேக்கமடைந்துள்ளன. இது தொடர்பாக மத்திய, மாநில அரசுகளுக்கு மனுக்கள் அளித்தும் எந்தவிதமான நடவடிக்கையும் எடுக்கவில்லை. தொழிலில் ஏற்பட்ட நஷ்டம் காரணமாக தற்கொலை செய்வதாகவும் தனது இறப்பிற்கு மத்திய, மாநில அரசுகள்தான் காரணம் என கடிதம் ஒன்றையும் எழுதி வைத்துள்ளார்.
இந்த சம்பவம் தொடர்பாக வழக்குப்பதிவு செய்த வீரப்பன்சத்திரம் காவல் துறையினர் உடலை மற்றும் கடிதத்தை கைப்பற்றி விசாரணை நடத்தி வருகின்றனர்.
இந்நிலையில், ஜவுளி தொழிலில் ஏற்பட்டுள்ள நெருக்கடிக்கு உரிய தீர்வு ஏற்படுத்தி உயிரிழப்புகளை தடுக்க வேண்டும் என கனகராஜின் உறவினர்கள் மற்றும் விசைத்தறியாளர்கள் கோரிக்கை விடுத்துள்ளனர்.
இதையும் படிங்க: சாலையை கடந்த யானைக் கூட்டத்தால் போக்குவரத்து பாதிப்பு..!
