ஈரோடு மாவட்டம் தாளவாடி மலைப்பகுதியில் தாளவாடி பாரதிபுரம், மெட்டல்வாடி, அருள்வாடி, பனக்கள்ளி, திகனாரை, சிக்கள்ளி, தலமலை, கேர்மாளம், குளியாடா என 80-க்கும் மேற்பட்ட கிராமங்கள் உள்ளன. ஆண்டுதோறும் ஆகஸ்ட் மாதம் மானவாரி நிலங்களில் மக்காச்சோளம் பயிர் செய்வது வழக்கம்.
அதேபோல இந்தாண்டும் சுமார் 20 ஆயிரம் ஏக்கர் பரப்பளவில் தாளவாடி மலைப்பகுதி முழுவதும் மக்காச்சோளம் நடவு செய்யப்பட்டது. மூன்று மாத கால பயிரான மக்காச்சோளம் தற்போது ஒரு மாதகால பயிராக உள்ளது.
இந்த பயிர்களில் தற்போது படைப்புழு தாக்கம் அதிகரித்துள்ளது. பயிர்களின் இலைகளை படைப்புழுக்கள் தின்றுவிடுவதால் பயிர் வளர்ச்சி கடுமையாகப் பாதிக்கப்பட்டுள்ளது.
மலைப்பகுதியில் படைப்புழு தாக்குதல் என்பது மிகக்குறைவாக இருந்த சூழலில் தற்போது அதிகரித்துவருவது வேதனையளிக்கிறது. எனவே தமிழ்நாடு அரசு படைப்புழு நோயை கட்டுப்படுத்த நடவடிக்கை எடுக்க வேண்டும் என விவசாயிகள் கோரிக்கைவிடுத்துள்ளனர்.
