சென்னை மாநகர போக்குவரத்து கழக தொழிலாளர்கள் 441 நபர்களுக்கும், தமிழ்நாடு அரசு விரைவு போக்குவரத்து கழக தொழிலாளர்கள் 171 நபர்களுக்கும் என 612 ஓய்வு பெற்ற போக்குவரத்து கழக தொழிலாளர்களுக்கு பணிக்கொடை, விடுப்பு தொகை, ஈவுத் தொகை, வருங்கால வைப்பு நிதி என மொத்தம் 171 கோடியே 23 லட்ச ரூபாய்க்கான காசோலையை, இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் வழங்கினார்.
இந்நிகழ்வு சென்னை ராஜா அண்ணாமலைபுரம் கபாலீஸ்வரர் திருமண மண்டபத்தில் நடைபெற்றது. இதில் போக்குவரத்து துறை அமைச்சர் சிவசங்கர் உள்ளிட்டோர் பங்கேற்றனர். அப்போது நிகழ்ச்சியில் பேசிய அமைச்சர் உதயநிதி ஸ்டாலின் கூறுகையில், "10 ஆண்டுகால அதிமுக ஆட்சியில் போக்குவரத்துத்துறை ஒட்டுமொத்தமாக சீரழிந்த நிலையில் இருந்தது, தற்போது அதை சீரமைக்கும் வகையில் திட்டங்கள் தீட்டப்பட்டுள்ளன.
போக்குவரத்து துறை சார்ந்த அனைத்து நிகழ்ச்சிகளிலும் நான் பங்கேற்று வருகிறேன். அமைச்சர் சிவசங்கர் எந்த பணியை கொடுத்ததாலும் ஆர்ப்பாட்டம் இல்லாமல் நேர்த்தியாக செம்மையாக செய்வார். சிறந்த எழுத்தாளரும் கூட. பே -மெட்ரிக்ஸ் முறையில் ஊதியம் வழங்குவதால் போக்குவரத்து தொழிலாளர்களுக்கு 5 சதவீத ஊதிய உயர்வு கிடைத்துள்ளது. சுகாதாரம், கல்வி போல மக்களுடன் நேரடி தொடர்பில் உள்ள துறை போக்குவரத்து. ஒரு பேருந்து 2 நிமிடம் தாமதமாக வந்தாலும் மக்களிடம் எந்தளவிற்கு பெரும் தாக்கத்தை ஏற்படுத்தும் என்பதை நாம் அறிவோம்.
நீங்கள் வகிப்பது பதவி அல்ல, பொறுப்பு என்று கருணாநிதி சொல்வார். அதற்கு ஏற்ப போக்குவரத்து தொழிலாளர்கள் மக்களுக்கு பொறுப்புமிக்க சேவையை ஆற்றி வருகிறார்கள். தொழிற்சங்க கோரிக்கைகளுக்கு உடனுக்குடன் செவிசாய்த்து நடவடிக்கை மூலம் எடுத்து வருகிறோம்.
கடந்த 2 ஆண்டில் 288 கோடி கட்டணமில்லா பயணங்களை பெண்கள் மேற்கொண்டுள்ளனர். புதிய அரசு அமைந்துள்ள கர்நாடகாவில் இத்திட்டம் அமலாகி உள்ளது.
கட்டணமில்லா பயண திட்டம் அமலாகும் முன்பு அரசு பேருந்தில் பயணிக்கும் பெண்களின் எண்ணிக்கை 40 சதவீதமாக இருந்தது, தற்போது 70 சதவீதம் வரை அதிகரித்து உள்ளது. எவ்வளவு நிதிச்சுமை இருந்தாலும், கோரிக்கைகளை அரசு நிறைவேற்றும்" எனக் கூறினார். அதனை தொடர்ந்து, போக்குவரத்துத்துறை அமைச்சர் சிவசங்கர் கூறுகையில், "போக்குவரத்து கழகங்களை நாட்டுடமையாக்கியவர் கருணாநிதி. தமிழகத்தில் 21 ஆயிரம் பேருத்துகள் இயக்கப்பட்டு வருகின்றன.
அப்படிப்பட்ட கருணாநிதி வழியில் வந்த ஆட்சியில், போக்குவரத்து கழகம் ஒருபோதும் தனியார் மயம் ஆகாது. தற்போது புதிய பணியாளர்களை பணி அமர்த்த மற்றும் புதிய பேருந்துகளை வாங்க முதலமைச்சர் உத்தரவிட்டு உள்ளர். பின்பு எப்படி போக்குவரத்து துறை தனியார் மயம் ஆகும்..? ஆனால் ஒருவருக்கு உடல்நிலை சரியில்லாவிட்டால் அவருக்கு மருத்துவம் பார்க்க வேண்டும், தேவைப்பட்டால் அறுவை சிகிச்சை செய்துதான் ஆக வேண்டும், அது அந்த நபருக்கு பாதகமாக அமையும் என்ற எண்ணத்தையும், கருத்தையும் சில தொழிற்சங்கங்கள் விதைக்க வேண்டாம்.
இந்த ஆண்டில் 2,800 கோடி ரூபாய் நிதி, மகளிர் இலவச பேருந்து பயணத்திற்காக தமிழக அரசு ஒதுக்கி உள்ளது. அதிமுக ஆட்சியில் போக்குவரத்து தொழிலாளர்களுக்கான ஊதிய உயர்வு ஒப்பந்தத்தை முறையாக நிறைவேற்றவில்லை. தீபாவளி, பொங்கலில் கடந்த ஆட்சிக் காலத்தில் இருந்த பிரச்சனைகள் இப்போது ஏற்படாதவாறு தேவையான அளவு பேருந்துகள் இயக்கப்படுகின்றன" எனக் கூறினார்.
இதையும் படிங்க: வெளிநாட்டு முதலீடுகளை பெருக்கத் திட்டம்.. ஒசாகா கோமாட்சு உற்பத்தி ஆலையை பார்வையிட்ட முதலமைச்சர்!
