திருவண்ணாமலை: திருவண்ணாமலையை அடுத்த ஊசாம்பாடி கிராமத்தைச் சேர்ந்தவர், இந்திராணி (47). இவரது கணவர் ராஜா. தனியார் உணவகத்தில் கூலி வேலை செய்து வரும் இவருக்கு, கடந்த சில வாரங்களுக்கு முன்பாக வேலை செய்யும் இடத்தில் காலில் அடிபட்டுள்ளது. இதன் காரணமாக இந்திராணி சிகிச்சை பெற்றும் வந்துள்ளார்.
இந்நிலையில், இந்திராணி காலில் அதிக வலி ஏற்பட்டதால், நேற்று முன்தினம் திருவண்ணாமலை அடுத்த புது மல்லவாடி பகுதியில் மின்வாரிய அலுவலகத்திற்கு எதிரே உள்ள தனியார் மருந்து கடைக்கு, வலியை போக்குவதற்காக ஊசி போடச் சென்றுள்ளார். அங்கு அவருக்கு மருந்து கடையின் உரிமையாளர் சரவணன் என்பவர் ஊசி போட்டுள்ளார்.
இதனையடுத்து, ஊசி போட்டுக் கொண்ட இந்திராணிக்கு, சில மணி நேரங்களில் மயக்கம் ஏற்பட்டுள்ளது. இதனால் அவர் திருவண்ணாமலை அரசு மருத்துவமனை மருத்துவக் கல்லூரியில் அனுமதிக்கப்பட்டுள்ளார். இவ்வாறு மருத்துவமனையில் அனுமதிக்கப்பட்ட அவர், அன்று மாலை சிகிச்சை பலனின்றி உயிரிழந்துள்ளார்.
தற்போது இறந்த இந்திராணியின் உடல், மருத்துவ பரிசோதனைகள் ஆய்வு செய்ய சோதனைக் கூடத்திற்கு அனுப்பப்பட்டுள்ள நிலையில், உயிரிழப்புக்கான காரணம் குறித்து திருவண்ணாமலை தாலுகா காவல்துறையினர் மற்றும் மருத்துவக் குழுவினர் தீவிர விசாரணையில் ஈடுபட்டு வருகின்றனர்.
இந்த சம்பவம் குறித்து திருவண்ணாமலை இணை மருத்துவத் துறை அதிகாரிகள், நேற்று மலவாடி பகுதியில் உள்ள மருந்துக் கடையில் ஆய்வு மேற்கொண்டனர். இந்த ஆய்வினை அடுத்து, மருந்து கடைக்கு சுகாதாரத்துறை அதிகாரிகள் சீல் வைத்துள்ளனர். மேலும், இந்த சம்பவத்திற்கு தொடர்புடைய மருத்து கடையின் உரிமையாளர் சரவணன் தலைமறைவாகி உள்ள நிலையில், காவல்துறையினர் அவரை தீவிரமாக தேடி வருகின்றனர்.
இதையும் படிங்க: அண்ணனூர் ரயில் நிலையத்தில் திடீர் தீ விபத்து.. அதிர்ஷ்டவசமாக உயிர் தப்பிய பயணிகள்!
