விசாரணை கைதி விக்னேஷ் வழக்கு: சிபிஐக்கு மாற்ற கோரிய மனு தள்ளுபடி

சென்னையில் விசாரணை கைதி விக்னேஷ் கொலை வழக்கு தொடர்பான வழக்கை சிபிஐக்கு மாற்றக் கோரிய மனுவை தள்ளுபடி செய்து சென்னை உயர் நீதிமன்றம் உத்தரவிட்டது.

சென்னை: தலைமைச் செயலக குடியிருப்பு காவல்துறையினர் கடந்த ஏப்ரல் 18ஆம் தேதி இரவு வாகன சோதனையில் ஈடுபட்டபோது, ஆட்டோவில் கஞ்சா மற்றும் ஆயுதங்களுடன் வந்ததாக விக்னேஷ் என்பவரை விசாரணைக்கு அழைத்துச் சென்றனர். இதுதொடர்பான விசாரணையின்போது விக்னேஷ் மரணம் அடைந்தார்.

இதுகுறித்து கொலை, எஸ்.சி., எஸ்.டி. வன்கொடுமை தடுப்புச் சட்டம் உள்ளிட்ட சட்டப்பிரிவுகளின் கீழ் சிபிசிஐடி காவல்துறையினர் வழக்குப்பதிவு செய்தனர். அப்போது சிபிசிஐடி சிறப்பு உதவி ஆய்வாளர் குமார், பவுன்ராஜ் , காவல்துறையினர் முனாப், ஜெகஜீவன், சந்திரகுமார், ஊர்காவல் படையை சேர்ந்த தீபக் ஆகியோரை கைது செய்தனர்.

இந்த நிலையில் இந்த வழக்கில் சிபிசிஐடி காவல்துறையினர் முறையாக விசாரணை நடத்தவில்லை என, வழக்கை சிபிஐக்கு மாற்றக் கோரி உயிரிழந்த விசாரணை கைதி விக்னேஷின் சகோதரர் வினோத் மற்றும் உறவினர்கள் ஆகியோர் சென்னை உயர் நீதிமன்றத்தில் மனுத்தாக்கல் செய்தனர்.

இந்த மனுவை உயர் நீதிமன்ற நீதிபதி சிவஞானம் விசாரித்தார். அப்போது மனுதாரர்கள் தரப்பில், “காவல் ஆய்வாளர் மோகன்தாஸ் என்பவர் மனுதாரர்கள் வீட்டுக்கு வந்து ஒரு லட்சம் ரூபாயை கொடுத்து வழக்கை முடிக்க முயற்சித்ததால், விசாரணை நியாயமாக நடக்குமா என்ற அச்சம் எழுந்தது. இந்த வழக்கில் இதுவரை இறுதி அறிக்கை தாக்கல் செய்யப்படவில்லை” என வாதிடப்பட்டது.

தொடர்ந்து, “விசாரணை முறையாக பாரபட்சமற்ற முறையில் நடைபெற்று வருகிறது. இதுவரை 84 சாட்சிகளிடம் விசாரித்து, 15 கண்காணிப்பு கேமரா பதிவுகள், ஆதாரங்கள் சேகரிக்கப்பட்டு விசாரணை முடிவடையும் நிலையில் இருக்கிறது. எனவே இந்த வழக்கை சிபிஐ விசாரணைக்கு மாற்றக் கூடாது” என சிபிசிஐடி தரப்பில் தெரிவிக்கப்பட்டது.

இரு தரப்பு வாதங்களையும் கேட்ட நீதிபதி சிவஞானம், “வழக்கின் புலன் விசாரணை குறித்த ஆவணங்களை ஆய்வு செய்வதில் சம்பவம் தொடர்பாக ஆறு காவல்துறையினர் கைது செய்யப்பட்டுள்ளனர். நேரில் பார்த்த சாட்சிகளிடம் வாக்குமூலம் பெறப்பட்டுள்ளது. சம்பவ இடத்திலிருந்து ரத்தக்கரை படிந்த இரும்பு கம்பி மற்றும் லத்தி ஆகியவை பறிமுதல் செய்யப்பட்டுள்ளது.

இதிலிருந்து சிபிசிஐடி பாரபட்சமான முறையில் விசாரணை நடத்துவதாக கூற எந்த ஆதாரங்களும் இல்லை. விசாரணை முடியும் தருவாயில் உள்ள நிலையில். இதில் நீதிமன்றம் தலையிட முடியாது. எனவே சிபிஐ விசாரணைக்கு மாற்றக் கோரிய மனு தள்ளுபடி செய்யப்படுகிறது” என உத்தரவிட்டார்.

இதையும் படிங்க: விசாரணை கைதி விக்னேஷ் கொலை வழக்கு - ஜாமீன் மனுக்கள் தள்ளுபடி